Pune : पुरंदर विमानतळासाठीच्या मोबदल्याचा प्रस्ताव दिवाळीनंतर; सात गावांतील ड्रोन सर्वेक्षण पूर्ण

Pune : पुरंदर आंतरराष्ट्रीय विमानतळासाठी सात गावांमधील १ हजार २८५ हेक्टर जागेचे ड्रोन सर्वेक्षण जिल्हा प्रशासनाकडून पूर्ण करण्यात आले आहे. मात्र, येत्या दोन दिवसांमध्ये प्रत्यक्षात जागेची मोजणीप्रक्रिया पूर्ण होणार असून, ही प्रक्रिया मुदतीपूर्वी पूर्ण होणार असल्याचा दावा जिल्हा प्रशासनाकडून करण्यात आला आहे. दरम्यान, विमानतळाच्या भूसंपादनासाठी प्रकल्पबाधित शेतकऱ्यांना देण्यात येणाऱ्या मोबदल्याचा प्रस्ताव दिवाळीनंतर राज्य शासनाला पाठविण्यात येणार आहे.

पुरंदर येथील प्रस्तावित आंतरराष्ट्रीय विमानतळासाठी संमतिपत्रे दिलेल्या शेतकऱ्यांच्या जमिनीची मोजणीप्रक्रिया जिल्हा प्रशासनाकडून सुरू करण्यात आली होती. पुरंदर तालुक्यातील एखतपूर, उदाचीवाडी, मुंजवडी, खानवडी, कुंभारवळण, खानवडी आणि पारगाव अशा सात गावांमधून १ हजार २८५ हेक्टर म्हणचे तीन हजार एकर जमीन संपादित करण्याचा निर्णय़ घेण्यात आला आहे. त्यासाठी ३ हजार २०० शेतकऱ्यांनी २ हजार ८१० एकर जागा देण्यासंदर्भातील संमतिपत्रे जिल्हा प्रशासनाला दिली आहेत.

विमानतळासाठीच्या सात गावांतील जमिनीचे ड्रोन सर्वेक्षण करून मोजणी पूर्ण करण्यात आली आहे. त्यानुसार १ हजार २८५ हेक्टर जमिनीची मोजणी पूर्ण झाल्याची माहिती जिल्हाधिकारी जितेंद्र डुडी यांनी दिली. मात्र, प्रत्यक्ष जागेची मोजणी अंतिम टप्प्यात असून ती दोन दिवसांमध्ये पूर्ण होईल, असा दावाही त्यांनी केला.

‘तालुक्यातील एखतपूरमध्ये २०१ हेक्टर, मुंजवडीत १०० हेक्टर, उदाचीवाडीत ५९ हेक्टर, कुंभारवळणात २६३ हेक्टर, वनपुरीत १८३ तसेच खानवडीत २९८ हेक्टर आणि पारगावमध्ये १२३ हेक्टर इतक्या जागेची मोजणी पूर्ण करण्यात आली आहे. उर्वरीत सुमारे ६० ते ६४ हेक्टर जमिनीची दोन दिवसांत मोजणी पूर्ण होईल, असे डुडी यांनी सांगितले.