Pune : पुणे पोलीस दलात शोककळा; वरिष्ठ पोलीस अधिकाऱ्याचा मध्यरात्री निधन

Pune : पुण्यातील लोणीकंद पोलीस ठाण्याचे वरिष्ठ पोलीस निरीक्षक सर्जेराव शामराव कुंभार (वय ५०) यांचे शनिवारी मध्यरात्री हृदयविकाराच्या तीव्र धक्क्याने निधन झाले. अत्यंत शांत, संयमी आणि हसतमुख अधिकारी म्हणून ओळखल्या जाणाऱ्या कुंभार यांच्या जाण्याने पोलीस दलासह सर्वसामान्यांमध्ये मोठी शोककळा पसरली आहे. त्यांच्या पश्चात आई, मोठा भाऊ, पत्नी आणि दोन मुले असा परिवार आहे. त्यांचा मुलगा सिद्धेश आणि मुलगी सिद्धी सध्या शिक्षण घेत आहेत. सिद्धी ही बी.ए.एम.एस.चे शिक्षण घेत असून वडिलांच्या जाण्याने या कुटुंबावर दुःखाचा डोंगर कोसळला आहे.

शनिवारी रात्री १० वाजेपर्यंत कुंभार पोलीस ठाण्यात आपली ड्युटी चोख पार पाडून वडगावशेरी येथील घरी परतले होते. मात्र, मध्यरात्री २ च्या सुमारास त्यांना अचानक हृदयविकाराचा तीव्र झटका आला. त्यांना तातडीने जवळच्या रुग्णालयात हलवण्यात आले, मात्र दुर्दैवाने उपचारापूर्वीच त्यांची प्राणज्योत मालवली. कोल्हापूरमधील हातकणंगले तालुक्यातील चावरे या मूळगावी त्यांच्यावर अंत्यसंस्कार करण्यात येणार आहेत. ते सध्या वडगावशेरी येथे राहत होते.

Nashik–Akkalkot Highway : नाशिक–सोलापूर अंतर कमी होणार; ३७४ किमीचा सहा पदरी महामार्ग, १९ हजार कोटींचा खर्च—मार्ग कसा, कुठून जाणार?

१२ ऑक्टोबर २०२४ रोजी त्यांनी लोणीकंद पोलीस ठाण्याचा पदभार स्वीकारला होता. पेरणेफाटा येथील विजयस्तंभ अभिवादन सोहळ्याचे नियोजन त्यांनी सलग दोन वर्षे अतिशय सुरक्षितपणे हाताळले होते. नुकतेच २५ ते २७ जानेवारी दरम्यान त्यांच्याकडे वाघोली पोलीस ठाण्याचा अतिरिक्त कार्यभार होता. योगायोगाने याच काळात वाघोलीत दोन खुनाच्या घटना घडल्या, मात्र दबावाखाली न येता कुंभार यांनी तातडीने आरोपींच्या मुसक्या आवळल्या आणि कायदा-सुव्यवस्था राखली. त्यांच्या याच उत्कृष्ट कामगिरीबद्दल २०२५ मध्ये त्यांना 'सुरक्षित पुणे' पुरस्काराने सन्मानित करण्यात आले होते.