Pune News : ससूनमध्ये केवळ चौकशीचा ‘खेळ’! केवळ समित्या नेमून अहवाल सादर करण्याची घाई

Pune News : बी.जे. वैद्यकीय महाविद्यालय तथा ससून सर्वोपचार रुग्णालयात वारंवार गैरप्रकार घडत आहेत. मात्र, केवळ समित्या नेमण्याचा सोपस्कार केला जात आहे. या समित्यांनी वैद्यकीय शिक्षण विभागाकडे अहवाल सादर करून अनेक महिन्यांचा कालावधी उलटल्यानंतरही त्यावर कारवाई झालेली नाही. त्यामुळे केवळ चौकशीचा खेळ सुरू असल्याचे चित्र आहे.

ससून रुग्णालयात निवासी डॉक्टरांनी ३१ डिसेंबरला मद्य पार्टी केली होती. त्यावेळी काही मद्यधुंद डॉक्टरांनी निवासी महिला डॉक्टरांच्या खोलीच्या दरवाजाची काच फोडली होती. या प्रकरणी एका महिला डॉक्टरने तक्रार केली होती. या प्रकरणाची दखल खुद्द उपमुख्यमंत्री अजित पवार यांनी घेतली होती. त्यांनी ससूनमध्ये आयोजित कार्यक्रमात या पार्टीची छायाचित्रे दाखविली होती. यानंतर रुग्णालय प्रशासनाने चौकशी समिती नेमली होती. या समितीने चौकशी करून जानेवारीअखेरीस अहवाल सादर केला. हा अहवाल वैद्यकीय शिक्षण विभागाकडे पाठवूनही अद्याप कारवाई झालेली नाही.

Sanjay Mandlik : खासदार संजय मंडलिकांच्या संपत्तीत काेट्यावधींची वाढ, प्रतिज्ञापत्रात कर्जाचाही उल्लेख

ससूनमध्ये अतिदक्षता विभागात (आयसीयू) दाखल रुग्णाला उंदराने चावा घेतल्याचा आरोप त्याच्या नातेवाइकांनी केला होता. ही घटना १ एप्रिलला घडली होती. या रुग्णाचा मृत्यू झाल्याने याप्रकरणी चौकशी समिती नेमण्यात आली होती. या समितीने चौकशी करून आपला अहवाल वैद्यकीय शिक्षण विभागाकडे सादर केला. यावर कोणतीही कारवाई झालेली नाही. रुग्णालयाच्या साफसफाईची जबाबदारी वैद्यकीय उपअधीक्षक सुजीत धिवारे यांच्याकडे होती. त्यामुळे या प्रकरणी महाविद्यालय प्रशासनाने त्यांच्या स्तरावर सुजीत धिवारे यांचे पद काढून घेण्याची दिखाऊ कारवाई केली आहे.
बी.जे.वैद्यकीय महाविद्यालयात पदव्युत्तरच्या पहिल्या वर्षात शिकणाऱ्या विद्यार्थिनीने रॅगिंगची तक्रार मार्च महिन्यात केली होती. या प्रकरणी चौकशी करून हा अहवाल वैद्यकीय शिक्षण विभागाकडे पाठविण्यात आला आहे. त्यावरील कारवाईही प्रलंबित आहे. याचबरोबर या महिन्यातही पदव्युत्तरच्या आणखी एका विद्यार्थिनीने रॅगिंगची तक्रार केली होती. याची चौकशी महाविद्यालयाच्या एका समितीकडून पूर्ण झाली असून, आता दुसऱ्या समितीकडून चौकशी सुरू आहे.