Pune Drugs Seized : शिक्षणाचं माहेरघर ड्रग्जच्या विळख्यात! लोहगाव परिसरात ५८ लाखांचे अमली पदार्थ जप्त; राजस्थानचा तरुण अटकेत

Pune Drugs Seized :: पुणे शहरातील वाढती गुन्हेगारी चिंतेचा विषय ठरत असताना शहराला ड्रग्जनेही विळखा घातल्याचे दिसत आहे. काही दिवसांपूर्वीच शिक्षणाच्या माहेर घरात १ कोटीचे अफीम जप्त करण्यात आले होते. त्यानंतर आता राजस्थानमधील तरुणाकडून ५८ लाखांचे अमली पदार्थ जप्त करण्यात आल्याचे उघडकीस आले आहे.

याबाबत अधिक माहिती अशी की, लोहगाव परिसरात पोलिसांनी अमली पदार्थ विक्री करताना राजस्थानमधील एका तरुणाला अटक केली. त्याच्याकडून ५८ लाखांचे मॅफेड्रोन आणि हेरॉइन जप्त केले आहे. गुन्हे शाखेच्या अमली पदार्थ विरोधी पथक-दोनच्या पथकाने ही कारवाई केली.

गोपीचंद रामलाल बिश्नोई (वय २८, रा. चऱ्होली, पुणे) असे अटक केलेल्या तरुणाचे नाव आहे. हा तरुण मूळचा राजस्थानमधील जालोर जिल्ह्यातील पुनासा भिनमाल येथील रहिवासी आहे. लोहगाव परिसरात एकजण मॅफेड्रोन आणि हेरॉइन विक्री करण्यासाठी येणार असल्याची माहिती मिळाल्यानंतर त्यानुसार पोलिसांनी छापा टाकून गोपीचंद बिश्नोई याला ताब्यात घेतले.