Crime News : ज्या रस्त्यावर तोडफोड, भाईगिरी करायचे त्या रस्त्यावरूनच काढली पोलिसांनी धिंड

किरकटवाडी - 'साहेब आता नाही ना कोणाला मारणार, आता माझी कॅपॅसिटी संपलीय, खुप दुखतंय ना.....' हे 'त्याच' सराईत गुन्हेगाराचे शब्द होते जो 'पोलीसांना काय कोणाच्या बापाला घाबरत नाही', असे म्हणत सिंहगड रस्त्यावरील किरकटवाडी, खडकवासला परिसरात भर रस्त्यावर सर्वसामान्य नागरिकांना शिवीगाळ, दमदाटी करत दहशत माजवत होता. वैभव इक्कर (वय 23 रा. कोल्हेवाडी, खडकवासला) असे त्या सराईत गुन्हेगाराचे नाव !

रविवारी ( दि.23) सराईत गुन्हेगार वैभव इक्कर व त्याचा साथीदार चेतन चोरघे (वय 27, रा. कोल्हेवाडी, खडकवासला) या दोघांनी सिंहगड रस्त्याला लागून असलेल्या हॉटेलमध्ये तोडफोड करत लूटमार केली होती.

तसेच कारवाईसाठी आलेल्या पोलीस अधिकारी व कर्मचाऱ्यांना शिवीगाळ, धक्काबुक्की केली होती. यापुर्वीही अनेक वेळा वैभव इक्कर या सराईत गुन्हेगाराने पोलीस कर्मचाऱ्यांवर हल्ला केलेला आहे. तसेच इतरही अनेक गंभीर गुन्हे त्याच्यावर दाखल आहेत.

हॉटेल व्यावसायिकाच्या तक्रारीवरून वैभव इक्कर व त्याचा साथीदार चेतन चोरघे यांच्यावर गुन्हा दाखल करण्यात आला आहे. त्यांच्यावर कडक कारवाई करण्याची प्रक्रिया प्रभारी अधिकारी अनमोल मित्तल यांनी सुरू केली आहे.

सर्वसामान्य नागरिकांमध्ये या गुन्हेगाराची असलेली दहशत मोडीत काढण्यासाठी आज सायंकाळी हवेली पोलीसांचे पथक वैभव इक्कर व चेतन चोरघे यांना घेऊन संबंधित हॉटेलमध्ये आले, त्यांचा 'यथेच्छ पाहुणचार' केला.

Kolhapur Wall Collapse News : कोल्हापुरात भिंत कोसळून महिलेचा मृत्यू, दुसऱ्या महिलेवर रुग्णालयात उपचार सुरु

तसेच ज्या रस्त्यावर हा गुन्हेगार सर्वसामान्य नागरिकांना भाईगिरी करत त्रास देत होता त्या खडकवासला-किरकटवाडी या गावांच्या शीव रस्त्यावरून त्याची धिंड काढली. या गुन्हेगारांच्या त्रासाने वैतागलेले परिसरातील शेकडो नागरिक काठ्यांचा आवाज ऐकून पोलीसांच्या 'कारवाईचे' कौतुक करताना दिसत होते.