Pune Crime : धक्कादायक! वसतिगृहात राहणार्‍या विद्यार्थ्याने गळफास लावून केली आत्महत्या

Pune : विश्रांतवाडी येथील सामाजिक न्याय विभागाच्या वसतिगृहात राहणार्‍या विजय नांगरे (वय- 21 वर्षे, मु. पो. मोहा, ता. गंगाखेड, जि. परभणी) या विद्यार्थ्याने गळफास लावून आत्महत्या केल्याची घटना आज घडली आहे. वसतिगृहाच्या पाचव्या मजल्यावरील अभ्यासिकेतील पंख्याला गळफास लावून घेतल्याचे सकाळी नऊ-साडेनऊच्या सुमारास दिसून आले.

विजय हा मॉडर्न महाविद्यालयात बी. ए. च्या द्वितीय वर्षात शिकत होता. त्याने मृत्यूपूर्वी सुसाईड नोट लिहून ठेवली आहे. घटना कळताच विश्रांतवाडी पोलिसांनी तातडीने मृतदेह ताब्यात घेऊन उत्तरीय तपासणीसाठी ससून रुग्णालयात पाठवला आहे. पोलीस अधिक तपास करीत आहेत.

या संदर्भात विश्रांतवाडी पोलीस ठाण्याचे वरिष्ठ निरीक्षक दत्तात्रय भापकर म्हणाले की हा विद्यार्थी गेले काही दिवस डिप्रेशनमध्ये होता. घटना सकाळी निर्दशनास आली असली तरी डॉक्टरांच्या म्हणण्यानुसार पहाटेच्या सुमारास त्याने गळफास लावून घेतला असावा. याआधीही त्याने भीमा नदीत उडी मारून आत्महत्येचा प्रयत्न केला होता. त्याच्या पालकांना कळवण्यात आले आहे. अधिक तपास चालू आहे.