पुणे : गर्भवतींच्या तपासणीवर महापालिकेचा भर, झिका संसर्गाच्या पार्श्वभूमीवर ४१ जणींचे नमुने एनआयव्हीला पाठवले

झिका विषाणूचा धोका हा गर्भवती आणि तिच्या गर्भाला असतो. यामुळे महापालिकेच्या आरोग्य विभागाने झिका विषाणूचे रुग्ण आढळून आलेल्या परिसरातील गर्भवतींची तपासणी सुरू केली आहे. एरंडवणे परिसरात एकूण ७२ गर्भवती असून, त्यातील १४ गर्भवतींचे नमुने तपासणीसाठी एनआयव्हीला पाठविण्यात आले आहेत. याचबरोबर मुंढवा परिसरातील ६० पैकी १८ गर्भवतींचे नमुने आणि डहाणूकर कॉलनी परिसरातील ३५१ पैकी ९ गर्भवतींचे नमुने तपासणीसाठी आरोग्य विभागाने एनआयव्हीकडे पाठविले आहेत.

आरोग्य विभागाने गर्भवतींसह एकूण ६४ जणांचे नमुने तपासणीसाठी एनआयव्हीला पाठविले. त्यातील सुमारे २५ जणांचे तपासणी अहवाल आरोग्य विभागाला मिळाले आहेत. त्यामुळे अद्याप सुमारे ४० जणांचे तपासणी अहवाल प्रतीक्षेत आहेत. एनआयव्हीमध्ये संपूर्ण देशभरात रक्तनमुने तपासणीसाठी येतात. त्यामुळे तपासणी अहवाल मिळण्यास विलंब होत आहे, अशी माहिती आरोग्य विभागातील सूत्रांनी दिली.

६६ हजारांचा दंड वसूल

पावसाळा सुरू होताच कीटकजन्य आजारांचा प्रादूर्भाव वाढू लागला आहे. यामुळे महापालिकेने या आजारांना प्रतिबंध करण्यासाठी पावले उचलली आहेत. आरोग्य विभागाकडून शहरात सर्वेक्षण सुरू आहे. यात २४६ घरांमध्ये डासांच्या अळ्या आढळून आल्या. या प्रकरणी ८२ जणांना नोटीस बजावून, त्यांच्याकडून देऊन ६६ हजार ८०० रुपयांचा दंड वसूल करण्यात आला आहे, अशी माहिती सहायक आरोग्य अधिकारी डॉ. राजेश दिघे य़ांनी दिली.