Pimpri Hit and Run : दीड वाजता आईला कारने उडवलं, अंगावर स्कूटर पडली, हॉस्पिटलला गेलो आणि... लेकीने सांगितला थरार

Pimpri Hit and Run : भरधाव कारने रस्त्याच्या कडेला उभे असलेल्या महिलेला उडवले. या अपघातानंतरही चालकाने कार तशीच पुढे नेली आणि रिक्षा व दुचाकीला धडक देऊन तो पसार झाला. ही घटना रविवारी दुपारी दीड वाजताच्या सुमारास पिंपरी गावात घडली. या घटनेनंतर काही काळ रस्त्यावर गोंधळ उडाला होता. दरम्यान, पोलिसांनी आरोपी कारचालक हरीश जालिंदर वाघमारे (रा. रहाटणी) याला अटक केली आहे. विजया नायर (वय ५५, रा. पिंपरी) असे जखमी महिलेचे नाव आहे. याप्रकरणी त्यांची मुलगी शरण्या सौरभ तिवारी (वय ३१) यांनी पिंपरी पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, विजया नायर या शिक्षिका असून, दर रविवारी त्या मल्याळी मुलांना मल्याळम् भाषा शिकवतात. रविवारी क्लास झाल्यानंतर त्या वाघेरे कॉलनीतील शिवाजी पुतळा परिसरात पायी चालत जात होत्या. रस्त्यावरील केळीविक्रेत्याकडून त्या केळी खरेदी करीत असताना समोरून आलेल्या भरधाव कारने नायर यांना धडक दिली. त्यात त्या रस्त्याच्या बाजूला उडून पडल्या. तेथे लावलेली दुचाकी त्यांच्या अंगावर पडली आणि डोक्यालाही गंभीर दुखापत झाली. स्थानिक नागरिकांनी त्यांना पिंपरी येथील जिजामाता रुग्णालयात दाखल केले. तिथे उपचार केल्यानंतर पुढील उपचारासाठी त्यांना खासगी रुग्णालयात दाखल करण्यात आले आहे.नायर यांना धडक दिल्यानंतर कारने एक रिक्षा आणि एका दुचाकीलाही धडक दिली. अपघात झाल्यानंतर कारचालक घटनास्थळी न थांबता कारसह पळून गेला.

Pune Crime : पोलिस उपनिरीक्षकाच्या अंगावर घातली गाडी; गोळी झाडल्यावरही संशयित पसार, नवले पुलाजवळील घटना

एका तासानंतर घेतली फिर्याद

या घटनेनंतर पोलिसांकडून दुर्लक्ष करण्यात आले आणि लवकर फिर्याद घेण्यात आली नाही, अशी तक्रार जखमी नायर यांची मुलगी शरण्या तिवारी यांनी केली. त्या म्हणाल्या, ‘दुपारी दीड वाजता माझ्या आईचा अपघात झाला. मी आईसोबत रुग्णालयात होते; त्यामुळे माझे पती फिर्याद देण्यासाठी पोलिस ठाण्यात गेले. मात्र, रक्तातील नात्याच्या व्यक्तीने फिर्याद देणे गरजेचे आहे, असे सांगून फिर्याद घेण्यात आली नाही. त्यानंतर साडेपाच वाजत मी फिर्याद देण्यासाठी गेले असता, सुरुवातीला पोलिसांनी दुर्लक्ष केले. त्यानंतर बोलत असताना पोलिस चिडले. सुमारे एक तासानंतर माझी फिर्याद घेण्यात आली.’

आरोपीला पिंपरीतून केली अटक

सीसीटिव्ही फुटेज प्राप्त झाल्यानंतर पोलिसांनी तत्काळ आरोपीला पकडण्यासाठी पथक तयार केले. गाडीच्या नंबर आणि सीसीटीव्ही फुटेजवरून तपास करून तत्काळ गाडीचा शोध लावला. कारचालक पिंपरीतच लपून बसला होता. पोलिसांनी त्याला अटक केली.

अपघाताची माहिती मिळताच पिंपरी पोलिसांनी घटनास्थळी धाव घेतली. कारचालकाला पकडण्यासाठी तत्काळ पथके रवाना करण्यात आली. या प्रकरणी गुन्हा दाखल करण्यात आला आहे. कारचालकाला ताब्यात घेतले आहे.