Mumbai : 50 खोके एकदम ओके' राष्ट्रवादीकडून गद्दार आणि खोके दिवस आंदोलन, मुंबईत पोलिसांनी कार्यकर्त्यांना घेतलं ताब्यात

Mumbai : मागच्यावर्षी आजच्या दिवशी शिवसेनेत मोठी बंडखोरी करत एकनाथ शिंदे यांच्या नेतृत्वात 40 आमदारांनी शिवसेनेतून बाहेर पडत आपला वेगळा गट स्थापन केला होता. त्यानंतर महाराष्ट्राच्या राजकारणात मोठी उलथापालथ होऊन महाविकास आघाडीचे सरकार कोसळले. त्यानंतर राज्यात शिंदे-फडणवीस सरकार सत्तेवर आले.

शिंदे- फडणवीस सरकार विरोधामध्ये राष्ट्रवादी काँग्रेसकडून राज्यभरामध्ये गद्दार आणि खोके दिवस साजरा करण्यात येत आहे. राष्ट्रवादीच्या या आंदोलनावेळी (NCP Protest) '50 खोके एकदम ओके' अशा घोषणा करत सरकारचा निषेध केला आहे. मुंबई पोलिसांनी आंदोलन करणाऱ्या राष्ट्रवादी कार्यकर्त्यांना ताब्यात घेतले आहे.

मुंबईतील राष्ट्रवादीच्या प्रदेश कार्यालयाबाहेर पोलिसांनी आंदोलनकर्त्यांना अटक ताब्यात घेतले आहे. आंदोलन करण्यापूर्वीच त्यांना ताब्यात घेण्यात आले आहे. राष्ट्रवादी युवक काँग्रेसचे प्रदेश अध्यक्ष मेहबूब शेख यांना पोलिसांनी ताब्यात घेतले. गद्दार दिनाच्या पार्शवभूमीवर मुंबई पोलिसांनी राष्ट्रवादीच्या कार्यकर्त्यांना नोटीस बजावल्या होत्या. शिवसेनेच्या ठाकरे गटासह राष्ट्रवादीच्या कार्यकर्त्यांना पोलिसांनी नोटीस पाठवल्या होत्या. आंदोलन केल्यास कारवाईचा इशारा पोलिसांनी दिला होता. अशामध्ये मुंबई पोलिसांनी आंदोलनापूर्वीच आंदोलनकर्त्यांना ताब्यात घेतले. या आंदोलनाच्या पार्श्वभूमीवर मुंबईत पोलिसांचा कडेकोट बंदोबस्त आहे.

तर दुसरीकडे मुंबई पोलिसांनी गद्दार आंदोलन करण्याच्या तयारीमध्ये असलेल्या ठाकरे गटाच्या कार्यकर्त्यांना देखील ताब्यात घेतले आहे. दक्षिण विभागातील अनेक शिवसैनिकांना पोलिसांनी ताब्यात घेतल आहे. आजपहाटे या सर्व शिवसैनिकांना पोलिसांनी नोटीस बजावली होती. शिवसेना शाखेच्या खाली पोलीस बंदोबस्त तैनात करण्यात आला होता. यावेळी कार्यकर्ते आंदोलनासाठी येण्यास सुरुवात होताच पोलिसांनी त्यांना ताब्यात घेतले. यावेळी पोलिसांसोबत वाद घालणाऱ्या दक्षिण मुंबईचे विभागप्रमुख संतोष शिंदे, उपनेते अरुण भाई दुधवडकर यांच्यासह काही शिवसैनिकांना पोलिसांनी अटक केली.