Navapur Police : भाजीपाला वाहतुकीच्या नावाखाली दारू तस्करी; नवापूर पोलिसांच्या कारवाईत ५ लाखांची दारू जप्त

Navapur : महाराष्ट्र- गुजरात सीमेवर दारू तस्करी रोखण्यात नवापूर पोलिसांना मोठं यश आलं आहे. भाजीपाला वाहतुकीच्या नावाखाली सुरू असलेली विदेशी दारूची तस्करी पोलिसांच्या कारवाईत उघड झाली आहे. या कारवाईत पोलिसांनी तब्बल पाच लाख रुपयांचा दारूचा साठा जप्त केला आहे. यामुळे दारू तस्करांचे धाबे दणाणले आहे.

नवापूर शहरातून जाणाऱ्या नॅशनल हायवे क्रमांक ६ वरील पोलिस निरीक्षक अभिषेक पाटील यांना गुप्त माहिती मिळाली होती की, भाजीपाला वाहतूक केल्या जात असलेल्या वाहनातून मोठी दारू तस्करी केली जात आहे. माहिती मिळताच नवापूर पोलिसांनी महाराष्ट्र- गुजरात सीमा असलेल्या महामार्गावर सापळा रचला. येणाऱ्या वाहनांची तपासणी करण्यास सुरवात केली होती.

दारूच्या खोक्यांवर होता भाजीपाला

दरम्यान पोलिसांना मिळालेल्या माहितीनुसार पांढऱ्या रंगाची पिकअप पोलिसांनी थांबवण्याचा इशारा करताच चालकाने वाहन वळवून पळून जाण्याचा प्रयत्न केला. मात्र, पोलिसांनी पाठलाग करत तत्काळ गाडीला रोखलं आणि तपासणी सुरू केली. वरवर पाहता गाडीत केवळ भाजीपाला दिसत होता. पण, पोलिसांनी बारकाईने तपासणी केली. तेव्हा भाजीपाल्याच्या खाली विदेशी दारूचे मोठ्या प्रमाणावर खोके लपवलेले आढळले.

५ लाख रुपयांचा दारूसाठा जप्त

गाडीत आढळून आलेला ५ लाख रुपये किमतीचा विदेशी दारूचा साठा पोलिसांनी जप्त केला असून, पिकअप वाहन देखील ताब्यात घेतले आहे. सध्या नवापूर पोलिस ठाण्यात याप्रकरणी गुन्हा दाखल करण्यात आला आहे. नवापूर पोलिसांनी केलेली ही धडक कारवाई दारू तस्करांचे धाबे दणाणून सोडणारी आहे. पोलिस अधीक्षक श्रवण दत्त, उपविभागीय पोलिस अधिकारी संजय महाजन आणि उपअधीक्षक आशित कबळे यांच्या मार्गदर्शनाखाली ही यशस्वी कारवाई पार पडली.