Mumbai : देशमुखांवरील आर्थिक गैरव्यवहाराचे प्रकरण : वाझे यांना माफीचा साक्षीदार होऊ देण्यास विशेष न्यायालयाचा नकार

Mumbai : राज्याचे माजी गृहमंत्री अनिल देशमुख यांच्यावरील आर्थिक गैरव्यवहाराच्या प्रकरणात बडतर्फ पोलीस अधिकारी सचिन वाझे यांनी माफीचा साक्षीदार होऊ देण्याच्या मागणीसाठी केलेला अर्ज विशेष न्यायालयाने बुधवारी फेटाळला. विशेष म्हणजे, अंमलबजावणी संचालनालयाने (ईडी) विशेष न्यायालयात अर्ज करून वाझे यांना प्रकरणात माफीचा साक्षीदार होण्यास सुरुवातीला मंजुरीही दिली होती. मात्र, ईडीने नंतर ही मंजुरी मागे घेतली.

माफीचा साक्षीदार होण्याची तयारी दाखवणारा अर्ज वाझे यांनी फेब्रुवारी महिन्यात ईडीकडे केला होता, मात्र त्यावर ईडीने काहीच प्रतिसाद दिला नाही. दरम्यानच्या काळात सीबीआयने देशमुखांविरोधात दाखल केलेल्या भ्रष्टाचाराच्या प्रकरणात वाझे यांना माफीचा साक्षीदार होण्यास विशेष न्यायालयाने परवानगी दिली. त्यानंतर, वाझे यांनी देशमुखांविरोधातील आर्थिक गैरव्यवहाराच्या प्रकरणातही माफीचा साक्षीदार होण्याची तयारी दाखवली व त्याबाबतचा अर्ज विशेष न्यायालयात केला. विशेष न्यायालयाने त्याची दखल घेऊन त्यावर भूमिका स्पष्ट करण्याचे आदेश ईडीला दिले होते. त्या पार्श्वभूमीवर ईडीने विशेष न्यायालयात अर्ज करून वाझे यांना या प्रकरणात माफीचा साक्षीदार होण्यास मंजुरी दिली होती.

Eknath Shinde : “मुख्यमंत्री करा म्हणत ते दारोदारी भटकत आहेत, त्यांचा चेहरा मित्रपक्षांनाही..”, एकनाथ शिंदेंची उद्धव ठाकरेंवर टीका

ईडीच्या मंजुरीनंतर विशेष न्यायालयाकडून वाझे यांना माफीचा साक्षीदार होण्यास परवानगी मिळणे शिल्लक होते, परंतु ही मंजुरी ईडीने नंतर मागे घेतली. या सगळ्या पार्श्वभूमीवर बुधवारी झालेल्या सुनावणीच्या वेळी वाझे यांच्या अर्जावर निर्णय देताना विशेष न्यायालयाने प्रकरणात माफीचा साक्षीदार होऊ देण्यास परवानगी मागणारा वाझे यांचा अर्ज फेटाळला. दरम्यान, वाझे यांनी आपल्या अर्जात या प्रकरणाशी संबंधित सर्व तथ्ये त्यांना उघड करायची आहेत आणि तपास यंत्रणेला त्यांनी नेहमीच सहकार्य केल्याचा दावा केला होता.\