Mumbai : सीएसएमटी स्थानकावर मोठा गोंधळ, रेल्वे रुळावर तरुण झोपल्याने खळबळ

मुंबईतील छत्रपती शिवाजी महाराज टर्मिनस हे सर्वात गजबजलेले रेल्वे स्टेशन आहे. या स्टेशनवर आज मोठा गोंधळ पहायला मिळाला. एक तरूण लोकल ट्रेनच्या रुळावर झोपला असल्याचे समोर आले आहे. एक लोकल प्लॅटफॉर्मवर येत असताना समोरच हा व्यक्ती झोपला होता. त्यामुळे प्रवाशांना आरडाओरडा करून लोकल थांबवण्याचा प्रयत्न केला. लोको पायलटच्या ही बाब लक्षात आल्यानंतर लोकल प्लॅटफॉर्मवर येण्यापूर्वीच थांबवण्यात आली. यामुळे मोठा अनर्थ टळला आहे. याबाबत सविस्तर माहिती जाणून घेऊयात.

CSMT स्थानकावर गोंधळ

मुंबईतील गजबजलेल्या छत्रपती शिवाजी महाराज टर्मिनस स्थानकावर आज एक धक्कादायक प्रकार घडला. लोकल गाड्यांच्या प्लॅटफॉर्मवर एक अवलिया झोपलेल्या अवस्थेत आढळून आला. त्याचवेळी समोरून लोकल गाडी येत असल्याने काही क्षणांसाठी स्थानकावर तणावाचे वातावरण निर्माण झाले. प्रवाशांनी ही बाब तात्काळ रेल्वे पोलिसांच्या निदर्शनास आणून दिली. परिस्थितीची गंभीरता लक्षात घेऊन रेल्वे पोलिसांनी त्वरित घटनास्थळी धाव घेत संबंधित व्यक्तीला सुरक्षितरित्या ताब्यात घेतले. त्यामुळे संभाव्य अपघात टळला आणि मोठी दुर्घटना होण्यापासून बचाव झाला.

तरुणाची चौकशी सुरू

घटनेनंतर काही काळ प्लॅटफॉर्मवरील हालचालींवर नियंत्रण ठेवण्यात आले होते. रेल्वे पोलिसांकडून संबंधित व्यक्तीची चौकशी सुरू असून तो प्लॅटफॉर्मवर कसा पोहोचला याचा तपास केला जात आहे. आजच्या या घटनेमुळे रेल्वे प्रवाशांसह प्रशासनातील कर्मचाऱ्यामध्ये गोंधळाचे वातावरण निर्माण झाले होते. या घटनेमुळे लोकल प्लॅटफॉर्मवर येण्यास उशिर झाल्याचेही समोर आले आहे.

दरम्यान, छत्रपती शिवाजी महाराज टर्मिनस हे मुंबईतील सर्वात जास्त प्रवाशांची गर्दी असलेले रेल्वे स्टेशन आहे. या स्टेशनवरून देशातील विविध शहरांसाठी रेल्वे गाड्या सुटतात. तसेच हे मध्य रेल्वेचेही एक प्रमुख स्टेशन आहे. या ठिकाणावरून दररोज शेकडा उपनगरीय गाड्या सुटत असतात. या स्टेशनवरून दररोज हजारो प्रवाशी प्रवास करत असतात. त्यामुळे हे एक अत्यंत महत्वाचे स्टेशन आहे. या स्टेशनवर आज ही घटना घडल्याने मोठा खळबळ उडाल्याचे पहायला मिळाले.