IND vs NZ 2nd T20 Live: हार्दिक पांड्याच्या नेतृत्वाखाली युवा टीम इंडिया करणार न्यूझीलंडशी दोन हात

 भारत आणि न्यूझीलंड यांच्यातील तीन सामन्यांच्या टी२० मालिकेतील पहिला सामना पावसाने वाहून गेला. वेलिंग्टन येथे झालेल्या पहिल्या टी२० मध्ये टॉस देखील होऊ शकला नाही. आता दोन्ही संघ आज माउंट मांउगानुई येथे भिडतील. हा सामना जिंकून भारतीय संघाला मालिकेत वर्चस्व गाजवायचे आहे. आता टी२० मालिकेत फक्त दोन सामने शिल्लक आहेत. अशा परिस्थितीत, रविवारी जिंकणाऱ्या संघाला २२ नोव्हेंबरला नेपियर येथे होणाऱ्या तिसऱ्या टी२० सामन्यात मालिका जिंकण्याची संधी असणार आहे.

टी२० विश्वचषकाच्या उपांत्य फेरीत दोन्ही संघ हरले होते. अशा परिस्थितीत त्या स्पर्धेच्या आठवणी विसरून संघांना नव्याने सुरुवात करायची आहे. भारतीय संघाची जबाबदारी कर्णधार हार्दिक पांड्यावर असेल. मिशन २०२४ टी२० विश्वचषकासाठी तो महत्त्वाचा मानला जात आहे. भारतीय संघ सध्या संक्रमणाच्या टप्प्यात आहे. अशा स्थितीत तो टी२० मध्ये कर्णधारपदाचा दावा करू इच्छितो. याशिवाय युवा खेळाडूही संघात स्थान मिळवण्यासाठी प्रयत्नशील असतील.