Husband Wife Clashes : पती-पत्नीच्या वादाचा भयानक अंत; आधी केला बायकोचा खून, नंतर त्याने स्वत:लाही संपवलं

Wardha Crime News: पती-पत्नीचं भांडण काही नवीन गोष्ट नाही. संसाराचा गाडा हाकताना पती आणि पत्नीमध्ये वाद होत असतात. काही वेळा हे वाद समजूतीने मिटतात, तर काही वेळा ते विकोपाला सुद्धा जातात. यातून पुढे भयानक घटना घडतात. अशीच एक घटना वर्धा जिल्ह्यातून समोर आली आहे. येथे एका पतीने आधी पत्नीची गळा आवळून हत्या केली. त्यानंतर स्वत: सुद्धा विष प्राशन करुन आपली जीवनयात्रा संपवली. या घटनेनं परिसरात हळहळ व्यक्त होत आहे. 

कुंदन ज्ञानेश्वर कांबळे (वय ४५) व शीतल कुंदन कांबळे (वय ४०, रा. धुळवा) असे मृत दाम्पत्याचे नाव आहे.ही खळबळजनक घटना वर्धा जिल्ह्यातील आंजी (मोठी) येथील वॉर्ड क्रमांक ४ मध्ये उघडकीस आली. या प्रकरणी खरांगणा (मोरांगणा) पोलिस ठाण्यात गुन्हा दाखल करण्यात आला आहे. 

मिळालेल्या माहितीनुसार, कांबळे दाम्पत्य काही वर्षांपासून आंजी (मोठी) येथे वॉर्ड क्रमांक ४ मध्ये भाड्याने राहत होते. सायंकाळपर्यंत त्यांच्या घराचे दार उघडले नसल्यामुळे शेजाऱ्यांनी याबाबत कुंदनच्या भावाला कळविले. भावाने लगेच धाव घेत आंजीच्या पोलिस चौकीत माहिती दिली असता पोलिसांनी रात्री आठ वाजता घटनास्थळ गाठले. पोलिसांनी मोठ्या परिश्रमाने घराचे दार उघडल्यावर घरात बघितले असता पती-पत्नी मृतावस्थेत आढळून आले.

पोलिसांनी घटनेचा तपास केला असता कुंदन यानेच पत्नी शीतलची गळा आवळून हत्या केली. त्यानंतर स्वत: विष प्राशन करीत आपली जीवनयात्रा संपवली. पोलिसांनी घटनास्थळाचा पंचनामा करून मृतदेह उत्तरीय तपासणीकरिता जिल्हा सामान्य रुग्णालयात पाठविला. यावेळी ठसे तज्ज्ञांसह प्रयोगशाळा तज्ज्ञांचाही चमू दाखल झाला होता.

दरम्यान, मृत दाम्पत्याला १३ वर्षांची मुलगी मैत्री व ९ वर्षांचा मुलगा सम्राट अशी दोन अपत्ये आहे. जेव्हा ही घटना घडली तेव्हा मैत्री आणि सम्राट हे दोघेही भाऊ-बहीण चार-पाच दिवसांपूर्वी धामणगाव (वाठोडा ) येथे आपल्या मामाच्या गावी गेले होते. त्यामुळे घरात पती-पत्नी हे दोघेच होते. वडिलांनी आईची हत्या करून स्वतः ही जीवनयात्रा संपविल्याने आता दोन्ही चिमुकले आई-वडिलांअभावी पोरकी झाले आहेत. आता त्यांच्यावर मोठे संकट कोसळलं आहे.