Himachal Pradesh Rain : हिमाचलमध्ये धो-धो, पावसाने मोडला 50 वर्षांचा रिकॉर्ड; कागदाच्या होडीसारख्या वाहत गेल्या गाड्या

राज्यात अनेक ठिकाणी भूस्खलनामुळे अनेकांचा मृत्यू झाला आहे. मनालीमध्ये 20 पूर पीडितांना वाचवण्यात आलं आहे. पाऊस आणि पुरामुळे राज्यभरात 300 हून अधिक लोक विविध ठिकाणी अडकले आहेत.

अनेक ठिकाणी वाहतुकीवर मोठा परिणाम झाला आहे. मुसळधार पावसामुळे चंदीगड आणि मनाली राष्ट्रीय महामार्गासह 765 रस्ते बंद करण्यात आले. गेल्या 48 तासांत भूस्खलनाच्या 20 मोठ्या घटना घडल्या आहेत. शिमला-कालका रेल्वे मार्गावर दरड कोसळल्याने रेल्वे वाहतूक प्रभावित झाली आहे. पुढील दोन दिवस राज्यभरातील शाळा आणि महाविद्यालये बंद ठेवण्यात आली आहेत. 

मुख्यमंत्र्यांनी मदत आणि बचाव कार्याचा घेतला आढावा

दरम्यान, मुख्यमंत्री ठाकूर सुखविंदर सिंह सुखू वैयक्तिकरित्या मदत आणि बचाव कार्यावर लक्ष ठेवून आहेत. ते राज्य आणि जिल्हा प्रशासनाच्या सतत संपर्कात आहेत, जेणेकरून आपत्कालीन परिस्थितीत लोकांना वेळेवर मदत करता येईल. रविवारी सायंकाळी उशिरा मुख्यमंत्र्यांनी सर्व उपायुक्तांशी बोलून संबंधित जिल्ह्यातील नुकसानीचा आढावा घेतला आणि बाधितांना तातडीने मदत देण्याच्या सूचना दिल्या.