Hadapsar : कार पार्किंग करताना झालेल्या अपघातात महिलेचा मृत्यू; तर एक महिला जखमी

शालन दत्तात्रय शेलार (वय ५०, रा. १५ नंबर, हडपसर) असे मृत्यू झालेल्या महिलेचे नाव आहे. जखमी महिला प्रा. इरफाना शब्बीर मुल्ला (वय-३२, रा. गुलामअलीनगर, हांडेवाडी रोड, हडपसर) यांच्यावर खासगी रुग्णालयात उपचार सुरू आहेत.

आज सकाळी सव्वादहा वाजण्याच्या सुमारास महाविद्यालयाचे प्राचार्य डॉ. नितीन घोरपडे कारने मुख्य प्रवेशद्वारातून आपल्या कार्यालयासमोर आले. तेथे कारमधून उतरून त्यांनी महाविद्यालयातील सेवक राहुल जाधव याच्याकडे कार पार्किंग करण्यासाठी दिली. त्यानंतर शिपाई सीमा देशमुख हिने राहूलकडून चावी घेऊन महाविद्यालयाच्या मैदानात स्वत: कार चालवण्याचा प्रयत्न केला.

त्यावेळी नियंत्रण सुटल्याने समोर चालत असलेल्या प्रा. मुल्ला यांना धडक देवून कार सुसाट वेगात महाविद्यालयाच्या जिन्याजवळील वॉशबेसीनच्या भिंतीला धडकली. त्यावेळी बेसीनवर कर्मचारी शालन शेलार हात धूवत होत्या. त्यांच्या पाठिमागून कमरेखाली कारची धडक बसल्याने तीच्या दोन्हीही पायांचा चेंदामेंदा झाला.

दोघींनाही तात्काळ खासगी रूग्णालयात दाखल करण्यात आले होते. मात्र, शालन शेलार यांचा उपचारापूर्वीच मृत्यू झाला. हडपसर पोलिसांकडून गुन्हा दाखल करण्याचे काम सुरू आहे.