Gallantry Awards 2026 : शुभांशू शुक्ला यांना सर्वोच्च ‘अशोक चक्र’; लष्करातील दोन महिला अधिकाऱ्यांना ‘शौर्य चक्र’ने गौरव

New Delhi : प्रजासत्ताक दिनाच्या पूर्वसंध्येला, राष्ट्रपती द्रौपदी मुर्मू यांनी सशस्त्र दलाच्या ७० जवानांना शौर्य पुरस्कार जाहीर केले. यामध्ये एक अशोक चक्र , तीन कीर्ती चक्र, १३ शौर्य चक्र, एक सेना पदक (शौर्य), ४४ सेना पदके (शौर्य), सहा नौसेना पदके (शौर्य) आणि दोन वायू सेना पदके यांचा समावेश आहे.

आंतरराष्ट्रीय अंतराळ स्थानकावर (आयएसएस) पाऊल ठेवणारे पहिले भारतीय ग्रुप कॅप्टन शुभांशू शुक्ला यांना सर्वोच्च शांतताकालीन लष्करी सन्मान ‘अशोक चक्र’ने सन्मानित करण्यात येणार आहे. गेल्या वर्षी जूनमधील ॲक्सिओम-४ मोहिमेत शुक्ला हे अंतराळात जाणारे दुसरे भारतीय; ‘आयएसएस’ला भेट देणारे पहिले भारतीय ठरले होते.

‘१ आसाम रायफल्स’चे मेजर अर्शदीप सिंग, ‘२ पॅरा (विशेष दला) चे नायब सुभेदार डोलेश्वर सुब्बा आणि ग्रुप कॅप्टन प्रशांत बालकृष्णन नायर यांना कीर्ती चक्र जाहीर करण्यात आले. नायर हे भारताच्या पहिल्या मानवी अंतराळ उड्डाण मोहिमेसाठी प्रशिक्षण घेतलेल्या चार अंतराळवीरांपैकी एक होते.

Republic Day 2026 : महाराष्ट्रातील 75 पोलिसांचा गौरव! उत्कृष्ट कामगिरीची दखल; देशातील 874 पोलिसांना राष्ट्रपती पदके

अशोक चक्र आणि कीर्ती चक्रानंतर शौर्य चक्र हा भारताचा तिसरा सर्वोच्च शौर्य सन्मान आहे. १३ शौर्य चक्र सन्मानांपैकी १० लष्करी जवानांना (एक मरणोत्तर), दोन नौदलाला आणि एक निमलष्करी अधिकाऱ्याला देण्यात आला.

लष्करातील लेफ्टनंट कर्नल आदित्य श्रीकुमार घाटगे (२१ पॅरा, स्पेशल फोर्स), मेजर अंशुल बाल्टू (३२, आसाम रायफल्स), मेजर शिवकांत यादव (५ पॅरा स्पेशल फोर्स), मेजर विवेक मेक (४२ नॅशनल रायफल्स ), मेजर लीशांगथेम दीपक सिंग (११ पॅरा, स्पेशल फोर्स) आणि कॅप्टन योगेंद्रसिंह ठाकूर (६ पॅरा, स्पेशल फोर्स), ‘१ आसाम रायफल्स’चे सुभेदार पी. एच. मोझेस, ‘४ राष्ट्रीय रायफल्सचे बलदेव चंद (मरणोत्तर), ‘३आसाम रायफल्स’चे रायफलमन मंगलेम संग वैफेई आणि ‘३३ आसाम रायफल्स’चे रायफलमन ध्रुव ज्योती दत्ता यांना शौर्य चक्र देण्यात आले आहे.

राष्ट्रपतींनी सशस्त्र दल आणि इतर जवानांना ३०१ लष्करी सन्मान (डेकोरेशन) मंजूर केले. यामध्ये ३० परम विशिष्ट सेवा पदके, चार उत्तम युद्ध सेवा पदके, ५६ अति विशिष्ट सेवा पदके, नऊ युद्ध सेवा पदके, दोन बार टू सेना पदके (विशिष्ट), ४३ सेना पदके (विशिष्ट), आठ नौसेना पदके (विशिष्ट), १४ वायू सेना पदके (विशिष्ट) आणि १३५ विशिष्ट सेवा पदकांचा समावेश आहे.