Bus Accident : यमुना एक्सप्रेस वेवर बसचा भीषण अपघात; 3 प्रवाशांचा दुर्दैवी मृत्यू तर 12 जण जखमी

दिल्लीहून बिहारच्या दिशेने निघालेल्या बस चालकाचे बसवरील नियंत्रण सुटल्यामुळे बस थेट डिव्हायडरला धडकल्यामुळे भीषण अपघात झाला. काही क्षणातच बसने दोन तीन वेळा पलटी मारली. या भीषण अपघातामध्ये ३ प्रवाशांचा दुर्दैवी मृत्यू झाला आहे. तर 12 पेक्षा अधिक प्रवासी जखमी झाले आहेत. ही दुर्देवी घटना रविवारी पहाटेच्या सुमारास यमुना एक्‍स्‍प्रेसवर घडली आहे.

अपघाताची माहिती मिळताच, स्थानिक पोलिसांनी घटनास्थळी धाव घेत घेतली. पोलिसांनी मृत ३ प्रवाशांचे मृतदेह ताब्यात घेतले असून जखमी झालेल्या प्रवाशांना तातडीने उपचारासाठी रुग्णालयात दाखल केले आहे. जखमींपैकी ६ प्रवाशांची प्रकृती चिंताजनक असल्याची माहिती समोर आली आहे.

मिळालेल्या माहितीनुसार, बस चालक दारूच्या नशेत होता. तो अतिवेगाने बस चालवत होता. त्यामुळे त्याचा बसवरील ताबा सुटला आणि बस यमुना एक्सप्रेसवेच्या दुभाजकाला धडकली. अपघातानंतर स्थानिकांनी तातडीने या घटनेची माहिती पोलिसांना दिली.

घटनेची माहिती मिळताच, पोलिस तातडीने घटनास्थळी दाखल झाले. अपघातातील जखमी झालेल्या प्रवाशांना अनेक रुग्णवाहिकांच्या माध्यमातून जिल्हा रुग्णालयात दाखल करण्यात आले. ६ गंभीर जखमींना आग्रा येथे हलवण्यात आले असून मृतांचा आकडा वाढण्याची भीती व्यक्त केली जात आहे.