Beed Crime : वरिष्ठ जीएसटी अधिकारी कारमध्ये मृतावस्थेत सापडले; 24 तासांपासून होते बेपत्ता, बीडमध्ये खळबळ

Beed : बीड शहरालगत आज एक धक्कादायक घटना उघडकीस आली आहे. गेल्या 24 तासांपासून बेपत्ता असलेल्या एका वरिष्ठ जीएसटी अधिकाऱ्याचा मृतदेह एका खाजगी चारचाकी गाडीत संशयास्पद अवस्थेत आढळून आला आहे. या घटनेमुळे शासकीय वर्तुळात आणि परिसरात मोठी खळबळ उडाली असून, मृत्यूचे नेमके कारण अद्याप अस्पष्ट आहे. सचिन नारायण जाधवर (वय 45, रा. बीड) असे मृत अधिकाऱ्याचे नाव आहे.

जाधवर हे वस्तू व सेवा कर विभागात महत्त्वाच्या पदावर कार्यरत होते. याप्रकरणी मिळालेल्या माहितीनुसार, सचिन जाधवर हे शुक्रवारी रात्रीपासून बेपत्ता होते. ते वेळेत घरी न परतल्याने आणि त्यांचा संपर्क होऊ न शकल्याने कुटुंबीय काळजीत होते. रात्रभर शोध घेऊनही ते न सापडल्याने अखेर त्यांच्या नातेवाईकांनी बीड येथील शिवाजीनगर पोलीस ठाण्यात ते बेपत्ता असल्याची अधिकृत तक्रार दाखल केली होती.

Baramati : पुण्यातील धक्क्यानंतर बारामतीत मोठी हालचाल; अजित पवार अचानक शरद पवारांच्या भेटीला

महामार्गालगत सर्विस रोडवर आढळला मृतदेह

पोलीस जाधवर यांचा शोध घेत असतानाच आज शनिवारी दुपारी एक वाजेच्या सुमारास धुळे-सोलापूर राष्ट्रीय महामार्गालगत असलेल्या कपिलधार कमानीजवळील बायपास रोडवर एक कार संशयास्पद स्थितीत उभी असल्याची माहिती मिळाली. पाली परिसरातील ग्रामस्थांनी ही माहिती बीड ग्रामीण पोलिसांना कळवली. माहिती मिळताच पोलीस पथकाने तातडीने घटनास्थळी धाव घेतली. पोलिसांनी घटनास्थळी जाऊन उभ्या असलेल्या चारचाकी गाडीची तपासणी केली असता, गाडीमध्ये सचिन जाधवर यांचा मृतदेह आढळून आला. एका जबाबदार शासकीय अधिकाऱ्याचा मृतदेह अशा प्रकारे महामार्गालगत सापडल्याने पोलिसांनी तात्काळ वरिष्ठ अधिकाऱ्यांना याची कल्पना दिली.

घटनास्थळी गर्दी मृतदेह उत्तरीय तपासणीसाठी

घटनेची माहिती मिळताच बघ्यांची मोठी गर्दी त्या ठिकाणी जमली होती. पोलिसांनी घटनास्थळाचा पंचनामा केला असून गाडीतून काही पुरावे हाती लागतात का, याची चाचपणी केली जात आहे. मृतदेह ताब्यात घेऊन तो उत्तरीय तपासणीसाठी बीड येथील जिल्हा सामान्य रुग्णालयात पाठवण्यात आला आहे.

घातपाताचा संशय

जाधवर यांचा मृत्यू नैसर्गिक आहे, की त्यांनी आपल्या आयुष्याची अखेर केली, की हा घातपाताचा प्रकार आहे, याचा तपास पोलीस करत आहेत. नातेवाईकांकडून घातपाताचा संशय व्यक्त केला जात आहे. ते रात्री नेमके कोणाला भेटायला गेले होते? त्यांच्यावर काही मानसिक दडपण होते का? या बाबींचा शोध घेतला जात आहे.

अधिकाऱ्याच्या मृत्यूने जिल्ह्यात हळहळ

परिसरातील सीसीटीव्ही फुटेज आणि जाधवर यांचे कॉल डिटेल्स तपासण्याचे काम पोलिसांनी करावे अशी नातेवाईकांची मागणी आहे एका कर्तव्यदक्ष आणि महत्त्वाच्या पदावर असलेल्या अधिकाऱ्याचा असा अंत झाल्याने बीड शहरात हळहळ व्यक्त केली जात आहे. बीड ग्रामीण पोलीस या प्रकरणाचा सखोल तपास करत असून शवविच्छेदन अहवालानंतरच मृत्यूचे खरे कारण समोर येईल.