Amravati Market Committee Result : अमरावतीत रवी राणांचा सुपडा साप! १८ पैकी १८ जागांवर यशोमती ठाकूर गटाचा दणक्यात विजय

Amravati Bazar Samiti Result: अमरावती बाजार समितीत आमदार रवी राणांच्या पॅनल विरुद्ध काँग्रेस आमदार यशोमती ठाकूर यांच्या पॅनलमध्ये थेट लढत होती. येथे आमदार रवी राणांचे भाऊ सुनील राणा निवडणुकीच्या रिंगणात असल्याने रवी राणांची प्रतिष्ठा पणाला लागली होती. अशात आमदार रवी राणा यांचे मोठे बंधू सुनील राणा यांना अमरावती बाजार समितीच्या निवडणुकीमध्ये मोठा धक्का बसला आहे. आमदार यशोमती ठाकूर यांच्या गटाने १८ पैकी १८ही जागा जींकत एक हाती सत्ता मिळवली आहे.

अमरावती कृषी उत्पन्न बाजार समिती निवडणूक मतमोजणी पूर्ण झाली असून अमरावती कृषी उत्पन्न बाजार समितीत यशोमती ठाकूर यांच्या ताब्यात गेली आहे. आमदार रवी राणा यांचे मोठे भाऊ सुनील राणा यांचाही या निवडणुकीत पराभव झाला आहे. आमदार रवी राणा गटाला आतापर्यंत एकही जागा मिळालेली नाही.

काँग्रेसचे बंडखोर माजी जिल्हापरिषद सदस्य प्रकाश भारसाकळे हे देखील पराभूत झाले आहेत. मिलींद तायडे, प्रकाश काळबांडे,राम खरबडे व प्रवीण अळसपुरे अशी विजयी उमेवारांची नावे आहेत. विजय झाल्याने अमरावतीत यशोमती ठाकूर यांच्या कार्यकर्त्यांचा जल्लोष सुरू आहे. ढोलताशांच्या गजरात गुलाल उधळून त्यांनी आनंद साजरा केला आहे.

अमरावती जिल्ह्यात सहा बाजार समितीची निवडणूक शुक्रवारी झाली. यामध्ये अमरावती वगळता अन्य बाजार समितीची मतमोजणी रात्री उशीरापर्यंत चालली. आगामी विधानसभेची रंगीत तालिम या अर्थाने झालेल्या या निवडणुकीत महाआघाडी समर्थित पॅनलने सर्वच बाजार समित्यांमध्ये घवघवीत यश मिळविले आहे.