राजपाल यादवला कर्जमुक्त करण्यासाठी ‘या’ व्यक्तीने दिले 1 कोटी 11 लाख रुपये; तरीही इतकं कर्ज बाकी

अभिनेता राजपाल यादव सध्या मोठ्या आर्थिक संकटात असून चेक बाऊन्स प्रकरणात त्याने तिहार तुरुंगात आत्मसमर्पण केलं आहे. राजपाल यादवने एका चित्रपटासाठी मोठं कर्ज घेतलं होतं आणि तो चित्रपट फ्लॉप ठरला होता. त्यानंतर घेतलेलं कर्ज फेडण्यास तो अपयशी ठरला होता. याचप्रकरणी आता त्याने तुरुंगात आत्मसमर्पण केलं आहे. मी एकटा पडलोय, माझ्याकडे पैसे नाही, कोणी मित्रही नाही, असं म्हणत तो तुरुंग अधिकाऱ्यांसमोर भावूक झाला होता. याप्रकरणी अभिनेता सोनू सूदने सोशल मीडियावर पोस्ट करत इंडस्ट्रीतल्या लोकांना राजपालच्या मदतीसाठी पुढे येण्याचं आवाहन केलं. त्याने स्वत:ही थोडी रक्कम राजपालला दिली. त्यानंतर आता आणखी एका व्यक्तीने राजपाल यादलची खूप मोठी मदत केली आहे.

‘जेमट्युन्स म्युझिक’ कंपनीचे मालक इंदरजीत सिंह यादव यांनी राजपालला 1.1 कोटी रुपयांची मदत केली आहे. याबद्दल ‘IANS’ या वृत्तसंस्थेशी बोलताना ते म्हणाले, “राजपालजींनी त्यांच्या दमदार कामगिरीतून प्रेक्षकांना खूप आनंद दिला. ते भारतीय चित्रपटसृष्टीचा अविभाज्य भाग आहेत. ही मदत पैशांबद्दलची नाही तर गरजेच्या वेळी आपल्या माणसाच्या पाठिशी उभं राहण्याबद्दलची आहे. आमची इंडस्ट्री हे एक कुटंब आहे आणि संकटकाळी कुटुंबीय एकमेकांच्या पाठिशी खंबीरपणे उभे राहतात.” याबाबत त्यांनी इन्स्टाग्रामवर पोस्ट लिहून इतरही कलाकारांना राजपालच्या मदतीसाठी पुढे येण्याचं आवाहन केलं आहे. याआधी सोनू सूद, गुरमीत चौधरी, जनशक्ती जनता दलाचे राष्ट्रीय अध्यक्ष तेज प्रताप यादव यांनी राजपालला मदत केली आहे.

2010 मध्ये राजपाल यादवने एम. एस. मुरली प्रोजेक्ट्स प्रायव्हेट लिमिटेडकडून त्याच्या एका चित्रपटासाठी पाच कोटी रुपयांचं कर्ज घेतलं होतं. ‘अता पता लापता’ या चित्रपटाचं दिग्दर्शन राजपाल करत होता. परंतु हा चित्रपट बॉक्स ऑफिसवर फ्लॉप झाला आणि त्यामुळे त्याला मोठा आर्थिक तोटा सहन करावा लागला. व्याज, दंड, विलंबित देयकं यांमुळे थकबाकीची रक्कम जवळपास 9 कोटी रुपयांपर्यंत वाढली. कर्ज चुकवण्यासाठी त्याने कर्जदात्याला अनेक चेक्स दिले होते. परंतु हे चेक्स बाऊन्स झाले. त्यामुळे नेगोशिएबल इन्स्ट्रुमेंट्स कायद्यांतर्गत त्याच्याविरोधात फौजदारी कारवाई सुरू झाली.

2 फेब्रुवारी 2026 रोजी दिल्ली उच्च न्यायालयाने राजपाल यादवला 4 फेब्रुवारी रोजी दुपारी 4 वाजेपर्यंत तुरुंग अधिकाऱ्यांसमोर आत्मसमर्पण करण्याचे निर्देश दिले. अखेर 5 फेब्रुवारी रोजी राजपालने सरेंडर केलं.