रत्नागिरी : कोकण रेल्वेकडून नेपाळला ‘डेमू’ची भेट

रत्नागिरी : कोकण रेल्वेच्या शिरपेचात मानाचा आणखी एक तुरा रोवला गेला आहे. भारत-नेपाळमधील दळणवळण यंत्रणा सक्षम बनवतानाच व्यापार आणि वाणिज्य संपर्क वाढवण्यासाठी रेल्वे मार्ग तयार करण्याची जबाबदारी कोकण रेल्वेला मिळाली आहे. या मार्गावर चालवण्यात येणारे ‘डेमू’ रेक चेन्नईतील इंटिग्रल कोच फॅक्टरीमध्ये बनविण्यात आले आहेत. जयनगर (बिहार) ते कुर्था (नेपाळ) या मार्गावर रेल्वे सेवा सुरू केली जाणार आहो. दोन डेमू रेल्वेचा संच कोकण रेल्वे नेपाळला प्रदान करणार आहे. या प्रकल्पाच्या कामाचा नुकताच प्रारंभ झाला आहे. पुढील वर्षभर कोकण रेल्वेच्या मार्गदर्शनाखाली नेपाळ रेल्वे कंपनी काम करणार आहे.

जयनगर-कुर्था विभागातील रेल्वे सेवा, रेल्वे प्रणालीचे संचालन आणि देखभालीसाठी नेपाळ सरकारने नेपाळ रेल्वे कंपनी लिमिटेडची स्थापना केली आहे. कोकण रेल्वेच्या मार्गदर्शनाखाली नेपाळ रेल्वे कंपनी ही रेल्वे सेवा सुरू करत आहे. भारताचे पंतप्रधान आणि केंद्रीय रेल्वे मंत्र्यांच्या आदेशानुसार कोकण रेल्वेमार्फत नेपाळ रेल्वे कंपनीला दोन डेमू संच (एका संचात पाच बोगी) वितरित केले आहेत. त्याचे उद्‌घाटन २ एप्रिलला झाले असून, जयनगर (भारत) आणि कुर्था (नेपाळ) मधील सीमेवर रेल्वेसेवा सुरु होणार आहे. सुरुवातीच्या प्रवासी सेवा दोन रेल्वे संचांसह सुरू केल्या जातील. ज्यांचा पुरवठा नेपाळ सरकारने केलेल्या निधीतून होणार आहे. नेपाळच्या राष्ट्रीय ध्वजावर आधारित रंगसंगतीला या रेल्वेला दिली आहे. नेपाळ रेल्वे कंपनीने कोकण रेल्वे कॉर्पोरेशन लिमिटेडला एक वर्षाच्या कालावधीत रेल्वे चालवण्यासह देखभालीसाठी नियुक्त केले आहे. या कराराचा एक भाग म्हणून, कोकण रेल्वेमार्फत गाडीचे संचालन आणि देखभाल होणार आहे. नेपाळ रेल्वेच्या कर्मचाऱ्‍यांनाही प्रशिक्षण देणार आहे. कोकण रेल्वे २६ तज्ज्ञ मनुष्यबळ आणि उपकरणे पुरवणार आहे. रेल्वे संचालनासाठी मूलभूत प्रणाली तयार करून रुळ आणि सिग्नलिंग देखभालीसाठी तांत्रिक सहाय्य कोकण रेल्वे करणार आहे.

कोकण रेल्वेला विशेषाधिकार

नेपाळमध्ये मजबूत रेल्वे व्यवस्था तयार करण्यासाठी भारत आणि नेपाळ सरकार यांच्या पाठिंब्याने कोकण रेल्वे, नेपाळ रेल्वे कंपनीला सहाय्य करणार आहे. यामुळे दोन्ही देशांमधील संबंध दृढ होण्यास मदत होईल. रेल्वे आणि भौतिक पायाभूत सुविधा मंत्रालयासोबत काम करण्याचे कोकण रेल्वेला विशेषाधिकार प्रदान केले आहेत.

आधुनिक यंत्रणांनी सज्ज ‘डेमू’

नेपाळमध्ये चालवण्यात येणाऱ्‍या डेमू रेल्वेचे संच आधुनिक बनावटीचे असून त्यामध्ये १६०० अश्‍वशक्ती क्षमता असलेली इंजिन जोडली आहेत. वातानुकूलित डबे, दर्जेदार सुविधा असलेली शौचालये त्यात आहेत.

भारत- नेपाळ रेल्वे सेवा

• जयनगर (भारत)- कुर्था (नेपाळ) मधील सीमा जोडणार
• सुरुवातीच्या प्रवासी सेवा दोन रेल्वे संचांसह सुरू होणार
• ‘डेमू’ रेक चेन्नईतील इंटिग्रल कोच फॅक्टरीमध्ये बनविले
• रेल्वे चालवण्यासह देखभालीसाठी कोकण रेल्वेची नियुक्ती
• कोकण रेल्वेमार्फत गाडीचे संचालन आणि देखभाल

• रुळ, सिग्नलिंग देखभालीसाठी तांत्रिक सहाय्य