मुंबई विमानतळावर 3 किलो सोने जप्त; अझरबैजान देशाच्या नागरिकाला अटक

मुंबई : मुंबईच्या आंतरराष्ट्रीय विमानतळावरून एअर इंटेलिजन्स युनिटने गुरूवारी केलेल्या कारवाईत 3 किलो सोने जप्त केले आहे. जप्त केलेल्या सोन्याची किंमत 1 कोटी 50 लाख रुपये असल्याचे सांगण्यात येत आहे. सोन्याच्या तस्करीप्रकरणी 37 वर्षीय माहिर अलीयेव या अझरबैजानी नागरिकाला अटक करण्यात आली आहे.

मुंबईच्या छत्रपती शिवाजी महाराज आंतरराष्ट्रीय विमानतळावर तपासणीदरम्यान एआययूच्या अधिकाऱ्यांनी एका विदेशी नागरिकाला संशयास्पद स्थितीत पकडले. त्याची झडती घेतली असता त्याच्याकडून तीन किलो सोने जप्त करण्यात आले. आरोपी माहिर अलीयेव दुबईहून अझरबैजानी पासपोर्टवर मुंबईत आला होता. त्याने चतुराईने हे सोने त्याच्या अंतर्वस्त्रात आणि त्याच्या हातातील ट्रॉलीच्या सामानात लपवून ठेवले.

अलियेवने तपासकर्त्यांना सांगितले की, प्रवासादरम्यान तो सोने घेऊन जात असल्याची त्याला माहिती होती. ही बॅग दुबईतील एका अनोळखी व्यक्तीने त्याला दिली होती, ज्याने त्याला मोबदल्यात मोठी रक्कम देण्याचे वचन दिले होते. सध्या अटक आरोपी न्यायालयीन कोठडीत आहे. अशाच प्रकारे यापूर्वी, दुबईच्या दोन प्रवाशांना मुंबई आंतरराष्ट्रीय विमानतळावर 4.5 कोटी रुपयांच्या 8.2 किलो सोन्याची तस्करी केल्याप्रकरणी अटक करण्यात आली होती.