मुंबई : मालाडमधील जनकल्याण नगरमधील 21 मजली इमारतीला आग

मुंबईच्या मालाड पश्चिमेकडील जनकल्याण नगर येथील इमारतीला आग लागल्याची घटना घडली आहे. मरीना इंक्लेव्ह ही 21 मजली इमारत आहे. लेवल वनची ही आग असून सकाळी 11:00 वाजण्याच्या सुमारास या इमारतीला आग लागली असून सुदैवाने या आगीत कसलीही जीवितहानी झाली नसल्याची माहिती समोर येत आहे. घटनेची माहिती मिळताच अग्निशमन दलाचे जवान घटनास्थळी दाखल झाले. अग्निशमन दलाच्या जवानांनी वेळेत पोहचून आगीवर नियंत्रण मिळवले.

या इमारतीच्या तिसऱ्या मजल्यावर ही आग लागली आहे.अग्निशमन दलाच्या जवानांनी शर्थीचे प्रयत्न करत एका तासात आगीवर नियंत्रण मिळवलं आहे.आगीचे मोठमोठे लोट खिडकीतून बाहेर येताना दिसत आहेत. यावेळी जीव वाचवण्यासाठी एका तरुणीने तिसऱ्या मजल्यावरुन खाली उडी घेतली.

घटनेची माहिती मिळताच अग्निशमन दलाच्या ४ गाड्या घटनास्थळी दाखल झाल्या. सुदैवाने या घटनेत कुठलीही जीवितहानी झालेली नाही. दरम्यान या आगीच्या घटनेचा एक व्हिडिओ समोर आला आहे, ज्यामध्ये एक तरुणी बाल्कनीतून खाली उडी मारून आपला जीव वाचवण्याचा पर्यंत करताना दिसत आहे.दरम्यान, ही आग नेमकी कशी लागली याची माहिती अद्याप समोर आलेली नाही.