पुणे: नोव्हेंबरची थंडी आटोक्यात; ढगाळ वातावरण आणि हलक्या पावसाची शक्यता

पुणे: महाराष्ट्रसह देशातील बहुतांश भागात नोव्हेंबर महिन्यात किमान तापमान सरासरीच्या बरोबरीने किंवा सरासरीपुढे राहण्याची शक्यता अधिक आहे. त्यामुळे नोव्हेंबरची थंडी आटोक्यातच राहणार आहे. डिसेंबरपासून मात्र थंडीचा कडाका वाढण्याची शक्यता आहे. नोव्हेंबरमध्ये अनेक भागांत अंशतः ढगाळ वातावरण राहणार असून, तुरळक ठिकाणी हलक्या पावसाचाही अंदाज आहे.

 भारतीय हवामानशास्त्र विभागाचे महासंचालक डॉ. मृत्युंजय महापात्रा यांनी मंगळवारी पत्रकार परिषदेत नोव्हेंबरमधील देशातील तापमान आणि पावसाबाबतची माहिती दिली दिली. दक्षिण भारतात सध्या ईशान्य मोसमी पाऊस पडत आहे. तो सरासरीपेक्षा १२३ टक्के जास्त होण्याची शक्यता आहे. त्यामुळे देशभर नोव्हेबरमध्ये सरासरीच्या तुलनेत ३० टक्के पाऊस जास्त राहिल. या काळात ढगाळ वातावरण राहिल्याने थंडीचा कडका कमी जाणवेल. केवळ हिमालयीन भाग, पूर्वोत्तर राज्यात थंडीचे प्रमाण अधिक राहणार आहे. दिवसाचे कमल तापमान सरासरीखाली राहणार असल्याने उन्हाचा चटकाही कमी असेल.

 बंगालच्या उपसागरात अधूनमधून वाऱ्यांची चक्रीय स्थिती राहील. त्यातून कमी दाबाचे पट्टे तयार होणार आहेत. परिणामी महाराष्ट्रासह देशाच्या काही भागात हलका पाऊस पडेल. त्यामुळे नोव्हेबरमध्ये किमान तापमानत मोठी घट होणार नाही. नोव्हेबर अखेर पावसाळी स्थिती दूर झाल्यानंतर डिसेंबरपासून थंडीचा कडाका वाढत जाईल. डिसेंबर ते फेब्रुवारी या कालावधीत थंडी राहू शकेल या दरम्यान अल्प पावसाची शक्यताही राहील. मात्र, त्याबाबतचे अंदाज वेळोवेळी जाहीर केले जातील, असे डॉ. महापात्रा यांनी सांगितले.

थंडीवर पावसाचा परिणाम

गेल्या काही वर्षांपासून नैऋत्य मोसमी पावसाचा प्रवास लांबतो आहे. ही बाब लक्षात घेऊन हवामान विभागाने पावसाच्या परतीच्या प्रवासाच्या नियोजित तारखा बदलल्या आहेत. मात्र, पाऊस या तारखांपेक्षाही पुढे जातो आहे. दक्षिणेतील ईशान्य मोसमी पाऊसही आता उशिराने सुरू झाला आहे. या सर्वांचा परिणाम थंडीवर आणि तिच्या कालावधीवर होतो आहे. याबाबतचा सखोल अभ्यास सध्या सुरू असल्याचे डॉ. मृत्युंजय महापात्रा यांनी स्पष्ट केले.