पुणे : नगरमधील एकाकडून २४ लाखांचे अमली पदार्थ जप्त; पुणे-सोलापूर रस्त्यावर गुन्हे शाखेची कारवाई

पुणे : नगरमधून अमली पदार्थ विक्रीसाठी आलेल्या एकाला गुन्हे शाखेच्या अमली पदार्थ विरोधी पथकाने पुणे-सोलापूर रस्ता परिसरातून अटक केली. त्याच्याकडून २४ लाख रुपये किंमतीचे दोन किलो चरस जप्त करण्यात आले.

औरंगजेब पप्पू अन्सारी उर्फ रंगा परदेशी (वय २७, रा. नगर) असे अटक करण्यात आलेल्याचे नाव आहे. पुणे-सोलापूर रस्त्यावरील उरळी कांचन परिसरात गुन्हे शाखेचे अमली पदार्थ विरोधी पथक गस्त घालत होते. त्या वेळी एक जण चरस विक्रीसाठी येणार असल्याची माहिती पोलिसांना मिळाली. पोलिसांनी सापळा लावून त्याला पकडले. त्याची झडती घेण्यात आली. तेव्हा त्याच्याकडे असलेल्या पिशवीत चरस सापडले.

परदेशीकडून दोन किलो चरस जप्त करण्यात आले असून जप्त करम्यात आलेल्या चरसची किंमत २४ लाख रुपये आहे. अमली पदार्थ विरोधी पथकाचे पोलीस निरीक्षक सुनील थोपटे, उपनिरीक्षक शुभांगी नरके, योगेश मांढरे, युवराज कांबळे, संतोष देशपांडे, संतोष जाधव आदींनी ही कारवाई केली.