“धैर्यशील मोहिते पाटील हेच माझ्या हत्येच्या कटाचे मास्टरमाईंड”, राम सातपुते यांचा गंभीर आरोप, पोलिसांचे छापासत्र, तपासात सापडेल काय?

Ram Satpute on Dhairyasheel Mohite Patil: माझ्या हत्येच्या कटाचे खासदार धैर्यशील मोहिते पाटील हे मास्टरमाईंड असल्याचा गंभीर आरोप माजी आमदार राम सातपुते यांनी केला आहे. काल मंत्री जयकुमार गोरे यांनी मोहितेंवर हाच आरोप केला होता. तर आता सातपुते यांनी एकच खळबळ उडवून दिली आहे. त्यामुळे सोलापूर जिल्ह्यातील वातावरण तापले आहे. सोलापूर जिल्हा परिषद आणि पंचायत समिती निवडणूक निकालानंतर इतके गंभीर आरोप केल्या जात असल्याने खळबळ उडाली आहे. याप्रकरणी चौकशीची मागणी करण्यात येत आहे. तर पोलिसांचे छापासत्र सुरू झाल्याने राजकीय वातावरण तापले आहे. काय आहे मोठी घडामोड?

मुख्यमंत्र्यांना पत्र

माझी हत्या कॉन्ट्रॅक्ट किलिंग पद्धतीने करण्याचा प्रयत्न होता. माझ्या हत्येच्या कटाचे अर्जुनसिंग मोहिते पाटील आणि  खासदार धैर्यशील मोहिते पाटील हे मास्टरमाईंड असल्याचा गंभीर आरोप माजी आमदार राम सातपुते यांनी केला. आता हा तपासाचा भाग आहे. पण अर्जुनसिंग मोहिते पाटील यांनी याविषयीचे वक्तव्य केलं. संवैधानिक पद्धतीने लढण्याची त्यांची ताकद संपली आहे. म्हणून ते असे प्रकार करण्याच्या प्रयत्नात आहेत.  एखाद्या कार्यकर्त्याला निवडणुकीत हरवू शकत नाही तेव्हा असा प्रकार करणे हे अत्यंत चुकीचं आहे.   भविष्यात माझ्या जीवाला काही झाले तर जबाबदारी कुणाची याबाबतची चिठ्ठी आपण मुख्यमंत्री देवेंद्र फडणवीस आणि मंत्री जयकुमार गोरे यांना पाठवल्याची माहिती राम सातपुते यांनी दिली. या सर्व घाडमोडीची जिल्ह्यात मोठी चर्चा आहे.

पोलिसांचा माळशिरसमध्ये तळ

माजी आमदार राम सातपुते यांच्या या गंभीर आरोपानंतर पोलीस यंत्रणा खडबडून जागी झाली आहे.माळशिरस तालुक्यात 3 दिवसांपासून पोलिसांनी काही जणांना ताब्यात घेऊन चौकशी सुरू केली असल्याची माहिती सातपुते यांनी दिली. भविष्यात माझ्या जीवाला काही झाले तर जबाबदारी कुणाची याबाबतची चिठ्ठी आपण मुख्यमंत्री आणि मंत्री जयकुमार गोरे यांना दिल्याचे ते म्हणाले. माझ्या हत्येच्या कटा संदर्भात पोलिसांना अगोदरच माहिती मिळाली त्यानुसार गेल्या 3 दिवसांपासून पोलिस माळशिरस तालुक्यात तळ ठोकून आहेत, अशी माहिती त्यांनी दिली.

जयकुमार गोरेंचाही तोच आरोप

दरम्यान काल मंत्री जयकुमार गोरे यांनी सुद्धा असाच आरोप केला. माळशिरसच्या निकालावर भाष्य करताना गोरे यांनी खासदार धैर्यशील मोहिते पाटील यांच्यावर त्यांनी टीका केली. माजी आमदार राम सातपुते यांच्या हत्येचा कट रचला गेला होता अशी धक्कादायक माहिती मंत्री गोरे यांनी दिली. मोहिते यांनी गोरेंवर गुंड म्हणत टीका केली होती. त्याला प्रत्युत्तर देताना मोहिते हेच सर्वात मोठे गुंड आहेत असा आरोप केला आहे.