उद्धव ठाकरे यांचे चिरंजीव तेजस ठाकरे यांची प्रकृती बिघडली, रुग्णालयात दाखल

माजी मुख्यमंत्री उद्धव ठाकरे यांचे चिरंजीव तेजस ठाकरे यांची प्रकृती बिघडली आहे. त्यामुळे त्यांना रुग्णालयात दाखल करण्यात आलं असून त्यांच्यावर उपचार सुरू आहे. मात्र, त्यांची प्रकृती स्थिर असल्याचं वैद्यकीय सूत्रांनी सांगितलं. तेजस यांची प्रकृती ठिक नसल्याने त्यांना तात्काळ रुग्णालयात नेण्यात आलं होतं. त्यांच्या सर्व चाचण्या केल्यानंतर तेजस यांना आता बरे वाटू लागल्याचं सांगितलं जात आहे. उद्धव ठाकरे आणि रश्मी ठाकरे हे रुग्णालयात तेजस यांच्यासोबत असल्याचंही सांगितलं जात आहे.

तेजस ठाकरेंवर उपचार सुरु

उद्धव ठाकरे यांचे पुत्र तेजस ठाकरेंवर रिलायन्स रुग्णालयात उपचार सुरु असल्याची माहिती समोर येत आहे. अचानक तब्येत बिघडल्यामुळे तेजस ठाकरेंना बुधवारी उपचारासाठी रुग्णालयात दाखल करण्यात आले. सध्या तेजस ठाकरेंची प्रकृती स्थिर असल्याची माहिती समोर आली आहे.

कोण आहेत तेजस ठाकरे?

तेजस ठाकरे हे उद्धव ठाकरे यांचे धाकले चिरंजीव आहेत. तेजस ठाकरे हे शिवसेनेच्या कार्यक्रमांना हजेरी लावतात. प्रचारात भाग घेतात. मात्र, त्यांनी अधिकृतपणे सक्रिय राजकारणात भाग घेतलेला नाही. तेजस ठाकरे हे वाइल्डलाइफ रिसर्चर आणि फोटोग्राफर आहेत. त्यांचं वाइल्डलाइफ फिल्डमधील काम अत्यंत मोठं आहे. तामिळनाडूत भारतीय रिसर्च टीमने गेकोची एक नवीन प्रजाती शोधली होती. रात्रभर जागणारी आणि अधिक बोलणारी ही पाल आहे. गर्मीच्या ठिकाणी ही पाल आढळते. या प्रजातीला तेजस ठाकरेंच्या नावावरून नाव दिलं आहे.

तेजस ठाकरे यांना ‘TT’ म्हणूनही संबोधलं जातं. तेजस यांनी 2012मध्ये एम्फिबियन आणि रेप्टाइल्सचा शोधात अंबोलीत पहिली हर्पिंग ट्रिप काढली होती. त्यावेळी त्यांचं वय खूप छोटं होतं. या ट्रिपच्यावेळी माश्याची नवीन स्पीशीज सापडली. या प्रजातीचं नाव नंतर शिस्तुरा हिरण्यकेशी ठेवलं गेलं.

2017मध्ये ते अंबोलीला आले होते. त्यांनी या माश्याचं डॉक्युमेंटेशन करण्यासाठी सर्व परवानग्या घेतल्या होत्या. तेजस यांनी 2021मध्ये कोव्हिड लॉकडाऊनच्या काळात संपूर्ण प्रक्रिया जाहीर केली होती. अंबोलीच्या शिव मंदिरातील तलावात त्याने हा मासा पाहिला होता. उद्धव ठाकरे मुख्यमंत्री असताना शिस्तुरा हिरण्यकेशी बायोडायव्हर्सिटी हेरिटेज साईट टॅग मिळाला होता. आतापर्यंत त्यांनी 60 स्पेशीज शोधल्या ाहेत.

तेजस ठाकरे यांनी एकदा मीडियाशी संवाद साधताना मार्मिक भाष्य केलं होतं. मी दसरा रॅलीतही अनेकदा सहभागी झालो. मी पूर्ण महाराष्ट्र फिरलोय. पण लोकांनी मला कधी नोटीस केलं नाही. पण मला गर्दी आणि रॅलींपेक्षा जंगल सर्वाधिक आवडते, असं तेजस ठाकरे म्हणाले होते.