अमरावती पदवीधर मतदार संघात मतमोजणी सुरू, निकालाची उत्‍कंठा

अमरावती : विधान परिषदेच्या अमरावती विभाग पदवीधर मतदारसंघात झालेल्या निवडणुकीची मतमोजणी सुरू झाली आहे. भाजपने ही निवडणूक प्रतिष्ठेची केल्याने  निकालाबाबत मोठी उत्सुकता आहे. मतमोजणीला बडनेरा मार्गावरील नेमाणी गोडाऊन येथे सकाळी ८ वाजतापासून सुरूवात झाली. भाजपचे उमेदवार डॉ. रणजित पाटील, काँग्रेसचे उमेदवार धीरज लिंगाडे यांच्‍यासह २३ उमेदवारांच्‍या भाग्‍याचा फैसला आज होणार आहे.

या निवडणुकीसाठी गेल्‍या ३० जानेवारीला मतदान झाले होते. एकूण ४९.६७ टक्‍के मतदारांनी मतदानाचा हक्‍क बजावला. विधान परिषदेच्या या जागांसाठी पसंतीक्रमाने मतदान करण्यात येते. पहिल्‍या पसंतीच्‍या मतमोजणीत कोटा पूर्ण न झाल्‍यास निकालाला विलंब होण्‍याची शक्यता आहे. मतमोजणीसाठी कडेकोट पोलीस बंदोबस्त ठेवण्यात आला आहे. मतमोजणीसाठी २८ टेबलांची व्‍यवस्‍था करण्‍यात आली आहे. मतमोजणीसाठी एकूण २८ पथकांची नियुक्‍ती करण्‍यात आली आहे.