पुणे : टोमॅटो, कोबी, घेवडा, मटार, पावट्याच्या दरात घट ; भेंडी, गवार, फ्लॉवर महाग

मागणी कमी झाल्याने टोमॅटो, कोबी, घेवडा, मटार, पावट्याच्या दरात घट झाली. भेंडी, गवार आणि फ्लॉवरच्या दरात वाढ झाली असून अन्य फळभाज्यांचे दर स्थिर असल्याची माहिती व्यापाऱ्यांनी दिली. गुलटेकडी येथील श्री छत्रपती शिवाजी मार्केट यार्डात रविवारी (१७ जुलै) राज्य तसेच परराज्यातून ९० ट्रक फळभाज्यांची आवक झाली. आंध्र प्रदेश, कर्नाटक, गुजरातमधून मिळून १० ते १२ ट्रक हिरवी मिरची, आंध्र प्रदेश आणि तामिळनाडूतून मिळून ३ ते ४ टेम्पो शेवगा, कर्नाटकातून २ ते ३ टेम्पो घेवडा, इंदूरहून ७ ते ८ टेम्पो गाजर, बेळगाव, धारवाडमधून २ ते ३ टेम्पो मटार, मध्य प्रदेश आणि गुजरातमधून मिळून १० ट्रक लसूण, आग्रा, इंदूरमधून मिळून ३० ते ३२ ट्रक बटाटा अशी आवक परराज्यातून झाली, अशी माहिती घाऊक बाजारातील प्रमुख अडते विलास भुजबळ यांनी दिली.

पुणे विभागातून सातारी आले ८०० ते ९०० गोणी, कोबी ८ ते १० टेम्पो, फ्लॉवर ८ ते १० टेम्पो, गवार ५ ते ६ टेम्पो, ढोबळी मिरची १० ते १२ टेम्पो, हिरवी मिरची १० ते १२ टेम्पो, टोमॅटो १३ ते १४ हजार पेटी, तांबडा भोपळा ८ ते १० टेम्पो, गाजर ५ ते ६ टेम्पो, भुईमूग शेंग १०० गोणी, कांदा १२५ ट्रक अशी आवक बाजारात झाली.

आवक वाढल्याने पालेभाज्यांच्या दरात घट
गेल्या आठवड्याच्या तुलनेत पालेभाज्यांची आवक वाढली असून सर्व प्रकारच्या पालेभाज्यांच्या दरात घट झाली आहे. रविवारी मार्केट यार्डातील तरकारी विभागात पावणेदोन लाख कोथिंबीर जुडी, मेथीच्या ५० हजार जुडींची आवक झाली. घाऊक बाजारात कोथिंबिरेच्या जुडीमागे १३ रुपये, कांदापातीच्या जुडीमागे ८ रुपये, पुदिन्याच्या जुडीमागे ४ रुपये, मुळ्याच्या जुडीमागे १४ रुपयांनी घट झाली. शेपू, पालक, मेथीच्या जुडीच्या दरात घट झाली असल्याची माहिती तरकारी विभागातील व्यापाऱ्यांनी दिली.

चिक्कू, संत्री, पपईच्या दरात दरात वाढ

घाऊक फळबाजारात चिक्कू, संत्री, पपईच्या दरात वाढ झाली. कलिंगड, लिंबे, डाळिंबाच्या दरात घट झाली आहे. खरबूज, अननस, सीताफळ, पेरु आणि मोसंबीचे दर स्थिर आहेत. फळबाजारात केरळहून ४ ट्रक अननस, डाळिंब ४० ते ४५ टन, मोसंबी ३० ते ४० टन, संत्री १ ते दीड टन, कलिंगड २ ते ४ टेम्पो, खरबूज १ ते २ टेम्पो, लिंबे दोन ते अडीच हजार गोणी, पपई ८ ते १० टेम्पो, पेरू २५० ते ३०० क्रेट्स (प्लास्टिक जाळी) अशी आवक फळबाजारात झाली.