पुणे : अश्लील फोटो सोशल मीडियावर व्हायरल करण्याची धमकी; १९ वर्षीय तरुणाची इमारतीवरून उडी मारत आत्महत्या

पुणे : सोशल मीडियाच्या माध्यामातून आपण सहज एखाद्या व्यक्तीसोबत संवाद साधू शकतो. पण याच सोशल मीडियाचे जेवढे फायदे तेवढेच तोटे देखील आहेत. ते कधी आर्थिक, तर कधी ते जीवावर देखील बेतले आहेत. अशीच एक घटना पुण्यातील दत्तवाडी भागात घडल्याचे समोर आले आहे. पैसै दे अन्यथा आक्षेपार्ह फोटो सोशल मीडियावर व्हायरल करण्याच्या धमकीमुळे एका १९ वर्षीय मुलाने इमारतीवरून उडी मारल्याची घटना घडली आहे. शंतनू वाडकर असे आत्महत्या केलेल्या तरुणाचे नाव आहे. तर प्रीत यादव असे धमकी देणाऱ्या आरोपी महिलेचे नाव आहे.

दत्तवाडी पोलीस स्टेशनचे वरिष्ठ निरीक्षक विजय खोमणे यांनी दिलेल्या माहितीनुसार, दत्तवाडी परिसरातील अनंत कुमार सोसायटीमध्ये शंतनू वाडकर हा १९ वर्षीय तरुण राहण्यास होता. तो सोशल मीडियावर सक्रिय असायचा. शंतनू याची इन्स्टाग्रामवरील प्रीत यादव असे आयडी असलेल्या तरुणीशी ओळख झाली. तर त्याच दरम्यान प्रीत यादव हिने शंतनूला अर्धनग्न फोटो मागितल्यावर त्याने तिला शेयर केले. त्यानंतर मला पैसे दे,अन्यथा तुझे अर्धनग्न फोटो व्हायरल करेल,अशी धमकी प्रीत यादव हिने दिली.

धमकीनंतर घाबरलेल्या शंतनूने प्रीतला ४ हजार ५०० रुपये ऑनलाईन पाठवले होते. मात्र, प्रीत सतत पैसे मागू लागल्याने या सततच्या त्रासाला कंटाळून शंतनूने २८ सप्टेंबर रोजी दुपारच्या सुमारास राहत्या इमारतीवरून उडी मारली. या घटनेनंतर शंतनूला तात्काळ जवळच्या रुग्णालयात दाखल केले मात्र, डॉक्टरांनी मृत घोषित केले. या घटनेनंतर शंतनूच्या कुटुंबियांनी पोलीस स्थानकात गुन्हा दाखल केला असून आरोपी प्रीत यादव हिचा शोध सुरु असल्याची माहिती पोलिसांनी दिली आहे.