Sanju Samson : विजयी खेळीनंतरही संजू सॅमसन अडचणीत? ‘ती’ कृती वादाच्या भोवऱ्यात.. ICC करणार कारवाई ?

संजू सॅमसनImage Credit source: Shubhajit Roy Karmakar/NurPhoto via Getty Images

आयसीसी मेन्स टी20 वर्ल्ड कप 2026 मध्ये भारताने अखेर सेमी फायनलमध्ये धडक मारली आहे. काल कोलकात्यातील ई़़डन गार्डन्समध्ये झालेल्या सामन्यात भारताने वेस्ट इंडिजवर 5 विकेट राखून विजय मिळवला. या सामन्यात विजयासाठी भारतीय संघासमोर 196 धावांचे लक्ष्य होते. संजू सॅमसनच्या शानदार फलंदाजीमुळे (नाबाद 97) भारतीय संघाने हे लक्ष्य चार चेंडू शिल्लक असताना गाठलं आणि खणखणीत विजय मिळवला.

या विजयासह, भारतीय संघाने टी20 वर्ल्डकपच्या सेमीफायनलमध्ये आपलं स्थान निश्चित केलं आहे, मात्र वेस्ट इंडिजचा संघ स्पर्धेबाहेर पडला. आता 5 मार्च रोजी, मुंबईतील वानखेडे स्टेडियमवर सेमीफायनलमध्ये भारतीय संघाचा इंग्लंडशी सामना होईल. तर पहिल्या सेमीफायनलमध्ये 4 मार्च रोजी दक्षिण आफ्रिका आणि न्युझीलंड हे दोघे एकमेकांशी भिडतील.

कालच्या सामन्यात भारतीय संघाकडून संजू सॅमसनने 50 चेंडूत 12 चौकार आणि 4 षटकारांसह नाबाद 97 धावा केल्या. वेस्ट इंडिजविरुद्ध विजयी चौकार मारताना संजू खूप भावूक झाला. तेव्हाच त्याने त्याचं हेल्मेट हवेत फेकलं आणि नंतर दोन्ही हात आकाशाच्या दिशेने करून त्याने देवाचे आभार मानले. त्याचा संघर्ष, त्याच्यावर असलेला दबाव आणि काल मिळालेल्या यशानंतर त्याने समाधानाने घेतलेला श्वास, यातून दिसून आलं. पण हेच विजयी सेलिब्रेशन त्याच्यासाठी महागात पडू शकतं.

संजूविरोधात आयसीसी करणार कारवाई ?

विजयानंतर हेल्मेट फेकून आनंद साजरा करणं संजू सॅमसनला महागात पडू शकतं. आंतरराष्ट्रीय क्रिकेट परिषद (ICC) त्याच्यावर शिस्तभंगाची कारवाई देखील करू शकते. खेळाडूंच्या वर्तनाबाबत ICC ची आचारसंहिता खूप कडक आहे. नियमांनुसार, मैदानावर हेल्मेट किंवा बॅट फेकणे गैरवर्तन ठरू शकते. अशा परिस्थितीत, खेळाडूला त्याच्या मॅच फीचा शुल्काचा दंड भरावा लागणं, डिमेरिट पॉइंट्स किंवा निलंबन अशी कारवाई होऊ शकते.

केवळ शिस्त पाळणं हा आयसीसीच्या आचारसंहितेचा उद्देश नाही तर खेळाडू, पंच आणि मैदानावरील इतर कर्मचाऱ्यांची सुरक्षितता सुनिश्चित करणं हेही उद्दिष्ट आहे. हेल्मेट किंवा बॅट अनवधानाने फेकल्याने दुखापत होऊ शकते. म्हणूनच क्रिकेटसारख्या खेळात संयमाला सर्वोच्च प्राधान्य दिले जाते.

संजू सॅमसनचं हे सेलिब्रेशन पाहून क्रिकेट चाहत्यांना पूर्वीचा एक प्रसंग आठवू शकतो. इंडियन प्रीमियर लीग (आयपीएल) 2023 दरम्यान, लखनौ सुपर जायंट्सने रॉयल चॅलेंजर्स बंगळुरूवर 1 विकेटने विजय मिळवल्यानंतर आवेश खानने त्याचे हेल्मेट जमिनीवर फेकलं होतं. तेव्हा आवेश हा आचारसंहितेचे उल्लंघन केल्याबद्दल दोषी ठरला होता आणि त्यांना फटकारण्यात आले. आता संजू सॅमसनवर आयसीसी काय कारवाई करते का याकडे सर्वांते लक्ष आहे.