Pune : शेडचे काम करताना तोल जाऊन पडल्याने कामगाराचा मृत्यू, तिघे जखमी; नऱ्हे भागातील दुर्घटना

Pune : पत्र्याचे शेड उभे करण्याचे काम करताना तोल जाऊन पडल्याने कामगाराचा मृत्यू झाला. ही घटना नन्हे भागातील वरद एंटरप्रायझेस गुरुवारी दुपारी घडली. या दुर्घटनेत एक कामगार जखमी झाला. कामगारांना सुरक्षाविषयक साधने न पुरविता दुर्घटनेस जबाबदार असल्याच्या आरोपावरून ठेकेदाराविरुद्ध सिंहगड रस्ता पोलिसांनी गुन्हा दाखल केला

विलास बाबूराव पांचाळ (वय ६२, रा. आनंद प्रभात अपार्टमेंट, शिवणे) हा कामगार मृत्यूमुखी पडला. तर या दुर्घटनेत पांडुरंग बाबुराव काळे (वय ५८) हे जखमी झाले असून, त्यांच्यावर रुग्णालयात उपचार सुरू आहेत. याप्रकरणी ठेकेदार सुरेश अरविंद पांचाळ (वय ६३, रा. सहयोगनगर, वारजे) यांच्याविरुद्ध गुन्हा दाखल करण्यात आला आहे. याबाबत पोलिस हवालदार विशाल खटावकर (वय ४२) यांनी सिंहगड रस्ता पोलिस ठाण्यात फिर्याद दिली आहे.

आरोपी ठेकेदार सुरेश पांचाळ यांचा फॅब्रिकेशनचा व्यवसाय आहे. विलास पांचाळ, पांडुरंग काळे हे त्यांच्याकडे कामाला आहेत. नन्हे भागातील वरद एंटरप्रायझेस येथे पत्र्याची शेड उभी करण्याचे काम ठेकेदार सुरेश पांचाळ यांना देण्यात आले होते. गुरुवारी दुपारी शेडचे काम ते करत होते.

त्यावेळी बारा फूट उंचीवरून मंगेश पांचाळ, काळे, मंगेश विश्वकर्मा पडले, चौघांना तातडीने रुग्णालयात दाखल करण्यात आले. उपचारांपूर्वीच विलास पांचाळ यांचा मृत्यू झाला होता, अशी माहिती पोलिस उपनिरीक्षक सागर पवार यांनी दिली. उपनिरीक्षक पवार तपास करत आहेत..