नवी मुंबईत 'एसीबी'चा मोठा दणका! नालेसफाईच्या बिलासाठी ठेकेदाराकडे १५% कमिशनची मागणी; एपीएमसीचे २ वरिष्ठ अधिकारी रंगेहाथ जाळ्यात!

नवी मुंबई: आशिया खंडातील सर्वात मोठ्या कृषी बाजारपेठांपैकी एक असलेल्या नवी मुंबईतील मुंबई कृषी उत्पन्न बाजार समिती (APMC) प्रशासनातील भ्रष्टाचार पुन्हा एकदा उघड झाला आहे. प्रलंबित बिलाचा धनादेश मंजूर करण्यासाठी कंत्राटदाराकडे तब्बल १५ टक्के लाचेची मागणी करणाऱ्या एपीएमसीच्या दोन वरिष्ठ अधिकाऱ्यांना लाचलुचपत प्रतिबंधक विभागाने (ACB) मंगळवारी (१९ मे) रंगेहात अटक केली. १ लाख ४० हजार रुपयांची रोकड स्वीकारताना ही धडक कारवाई करण्यात आली.

अटक करण्यात आलेले अधिकारी
या लाचखोरी प्रकरणात अटक करण्यात आलेल्या अधिकाऱ्यांमध्ये घनकचरा व्यवस्थापन व स्वच्छता विभागाचे उपसचिव (प्रभारी) तथा मुख्य आरोग्य अधिकारी डॉ. दीपक शरद आवटे (वय ४०) आणि स्वच्छता विभागाचा प्रभारी कार्यभार सांभाळणारा जनरेटर ऑपरेटर समीर म्हात्रे (वय ५५) यांचा समावेश आहे.

नेमके प्रकरण काय आहे?
तक्रारदार कंत्राटदाराला ऑक्टोबर ते एप्रिल या कालावधीसाठी एपीएमसी आवारातील नालेसफाई आणि वार्षिक देखभालीचे कंत्राट मिळाले होते. काम पूर्ण झाल्यानंतर कंत्राटदाराने ११ लाख ९२ हजार ७१६ रुपयांचे बिल मंजुरीसाठी सादर केले होते. जीएसटी (GST) वगळता या बिलाची निव्वळ रक्कम ९ लाख ७८ हजार २७ रुपये इतकी होती.

हे बिल मंजूर करून देण्याचा मोबदला म्हणून डॉ. दीपक आवटे आणि समीर म्हात्रे यांनी कंत्राटदाराकडे एकूण बिलाच्या १५ टक्के म्हणजेच १ लाख ४६ हजार रुपयांच्या लाचेची (कमिशन) मागणी केली. कंत्राटदाराने बिलासाठी तगादा लावल्यानंतर, अखेर १ लाख ४० हजार रुपयांवर तडजोड झाली.

एसीबीचा सापळा आणि कारवाई
लाच देण्याची इच्छा नसल्याने कंत्राटदाराने थेट नवी मुंबई लाचलुचपत प्रतिबंधक विभागाकडे (ACB) तक्रार नोंदवली. एसीबीचे पोलीस उपअधीक्षक धर्मराज सोनके यांच्या मार्गदर्शनाखाली विशेष पथकाने कांदा-बटाटा मार्केटमधील एपीएमसीच्या मुख्य प्रशासकीय इमारतीतील उपसचिव कार्यालयात सापळा रचला.

ठरल्याप्रमाणे कंत्राटदार लाचेची रक्कम घेऊन कार्यालयात पोहोचला. तिथे समीर म्हात्रे याने डॉ. आवटे यांच्या सांगण्यावरून १ लाख ४० हजार रुपयांची रोख रक्कम स्वीकारताच, दबा धरून बसलेल्या एसीबीच्या पथकाने दोघांना रंगेहात पकडले. याप्रकरणी एपीएमसी पोलीस ठाण्यात भ्रष्टाचार प्रतिबंधक कायद्यांतर्गत गुन्हा दाखल करण्यात आला असून पुढील तपास सुरू आहे.