10 कोटी दिले नाही तर मारून टाकू.., ‘बिग बॉस’ फेम अभिनेत्रीला धमकी

बॉलिवूड सेलिब्रिटींना धमक्या मिळाल्याच्या घटना दिवसेंदिवस वाढतच आहेत. आधी निर्माता-दिग्दर्शक रोहित शेट्टीच्या इमारतीबाहेर गोळीबार झाला, त्यानंतर अभिनेता रणवीर सिंहला ऑडिओ मेसेजद्वारे धमकी देण्यात आली. आता ‘बिग बॉस 13’ फेम अभिनेत्री हिमांशी खुरानाला खंडणीची मागणी करत धमकी देण्यात आली आहे. हिमांशीकडे 10 कोटी रुपये खंडणीची मागणी करण्यात आली आहे. सिनेसृष्टीतील हाय-प्रोफाइल लोकांना टारगेट करण्याची प्रकरणं दिवसेंदिवस वाढत आहेत. हिमांशी ही पंजाबी सिनेसृष्टीतील प्रसिद्ध अभिनेत्री आहे. या धमकीविरोधात तिने मोहाली पोलीस ठाण्यात तक्रार दाखल केली आहे. तर सोहाना पोलीस ठाण्यात धमकीच्या या ई-मेलप्रकरणी एफआयआर दाखल करण्यात आली आहे. धमकीचा ई-मेल तिला तिच्या वैयक्तिक ई-मेल आयडीवर मिळाला असून त्यात छोटा मेसेज आणि ऑडिओ क्लिपसुद्धा आहे.

ऑडिओ क्लिपमध्ये एका परदेशी गुंडाचा आवाज येत असल्याचं म्हटलं गेलंय. “झीशान अख्तर टीम टोन बोलदे, तौडे लाय इक इम्पॉर्टंट मेसेज साडा”, असं तो गँगस्टर या क्लिपमध्ये म्हणाला आहे. त्यानंतर त्याने 10 कोटी रुपयांच्या खंडणीची मागणी केली. पीटीआयने दिलेल्या वृत्तानुसार, पोलीस अधीक्षक सौरव जिंदाल यांनी सांगितलंय की हा मेसेज परदेशात असलेल्या गुंडाने पाठवला आहे. त्याचं मूळ शोधण्यासाठी तपास सुरू आहे.

या घटनेमुळे हिमांशी खुराना आणि तिचे कुटुंबीय भयभीत झाले आहेत. त्यांनी तात्काळ तक्रार दाखल करत पोलिसांना कारवाई करण्याची विनंती केली. ई-मेल आणि व्हॉइस नोट्सचं मूळ शोधण्यासाठी पोलीस अधिकारी डिजिटल पुराव्यांचा तपास करत आहेत. धमकीत झीशान अख्तरचा उल्लेख का झाला, याचाही तपास पोलीस करत आहेत. ऑक्टोबर 2024 मध्ये मुंबईत झालेल्या राष्ट्रवादीचे नेते बाबा सिद्दिकी यांच्या हत्येप्रकरणातील तो वाँटेड आहे. अख्तरते लॉरेन्स बिष्णोई, गोल्डी ब्रार आणि रोहित गोदारा यांच्याशी संबंधित प्रतिस्पर्धी टोळ्यांशी संबंध आहेत.

कोण आहे हिमांशी खुराना?

पंजाबमधील किरतपूर साहित इथली 34 वर्षीय अभिनेत्री हिमांशी खुराना हिने वयाच्या 16 व्या वर्षी मॉडेलिंगची सुरुवात केली. 2011 मध्ये तिने मिस लुधियानाचा किताब जिंकला होता. ‘बिग बॉस’च्या तेराव्या सिझनमध्ये ती स्पर्धक म्हणून सहभागी झाली होती. सोशल मीडियावर तिचे 1.2 कोटींहून अधिक फॉलोअर्स आहेत.