नागपूर : कळमना जवळील उड्डाण पूल कोसळण्याचे गूढ कायम, तज्ज्ञांच्या दोन समित्यांना कारणे शोधण्यात अपयश

नागपूर : पूर्व नागपुरातील कळमना ते पारडी दरम्यानचा निर्माणाधीन उड्डाण पूल कोळसण्याची कारणे शोधण्यात दोन तज्ज्ञ समित्यांना अपयश आले असून पूल नेमका का कोसळला? याचे गुढ कायम आहे.

भारतीय राष्ट्रीय महामार्ग प्राधिकरण (एनएचएआय) या उड्डाण पुलाचे बांधकाम करीत आहे. हा निर्माणधीन पूल १९ ऑक्टोबर २०२१ कोसळला होता. सुदैवाने यात प्राणहानी झाली नाही, परंतु बांधकामाच्या गुणवत्तेवर प्रश्नचिन्ह निर्माण झाले होते. ही बाब एनएचआयने गंभीर्याने घेऊन प्रकल्प अधिकाऱ्यांविरुद्ध कारवाई केली होती. त्यानंतर आयआयटी मुंबईच्या तीन तज्ज्ञांच्या समितीकडून पूल कोसळण्याच्या कारणांचा शोध घेण्यासाठी समिती नेमली होती. समितीने केलेल्या चौकशीत बांधकामाची गुणवत्ता योग्य असल्याचे आढळून आले.

त्यानंतर एनएचएआयने आणखी एक समिती स्थापन केली. या समितीमध्येदेखील तीन तज्ज्ञ होते. या समितीला देखील पूल कोसळण्याची कारणे शोधता आले नाहीत, असे एनएचएआयचे विभागीय अधिकारी व मुख्य महाव्यवस्थापक राजीव अग्रवाल यांनी सांगितले. पंतप्रधान नरेंद्र मोदी यांच्या हस्ते २०१४ मध्ये या पुलाचे भूमिपूजन झाले होते. तीन वर्षात पूल पूर्ण होणे अपेक्षित होते. विलंबामुळे या प्रकल्पाची किंमत वाढली. शिवाय आणखी सहा महिने पूल वाहतुकीसाठी खुला होण्यास लागणार आहे.

दरम्यान, पुलाच्या बांधकामावर ४४९ कोटी रुपये खर्च अपेक्षित होता. परंतु आता ४८ कोटी रुपये अतिरिक्त खर्च होतील. या पुलाचे काम २०२२ च्या अखेर पूर्ण होईल, असे अग्रवाल यांनी स्पष्ट केले.