धक्कादायक! मिरजमध्ये दोन लहान मुलांची विक्री, चार जणांवर गुन्हा दाखल, किती रुपयांमध्ये झाली विक्री?

Miraj News : राज्यात गेल्या अनेक दिवसांपासून मोठ्या प्रमाणात क्राईमच्या घटना घडत आहेत. अशातच आता मिरजमधून एक धक्कादायक बातमी समोर आली आहे. ज्याने संपूर्ण मिरज शहरात भीतीचं वातावरण पसरल आहे. मिरज शहरात दोन लहान मुलांची प्रत्येकी 20 हजार रुपये दराने एकूण 40 हजार रुपयांमध्ये बेकायदेशीररीत्या दत्तक म्हणून विक्री केल्याचा गंभीर प्रकार उघडकीस आला आहे. या घटनेची माहिती जिल्हा बाल संरक्षण अधिकारी कक्षाला मिळाल्यानंतर ही घटना समोर आली. त्यानंतर त्यांनी तातडीने चौकशी सुरू करण्यास सुरुवात केली आहे.

प्राथमिक तपासात सुभाषनगर परिसरात राहणाऱ्या मनीषा जाधव हिने दोन पुरुष बालके 40 हजार रुपयांमध्ये दत्तक म्हणून दिल्याचे निष्पन्न झाले. कोणतीही कायदेशीर दत्तक प्रक्रिया न राबवता थेट पैशांच्या मोबदल्यात बालकांची विक्री केल्याचा आरोप आहे. तिच्याकडून सचिन लोंढे, सुरेखा आणि सचिन गोसावी यांनी ही दोन्ही बालके दत्तक घेतल्याचे तपासात स्पष्ट झाले आहे.

अधिकाऱ्यांची तक्रार, गुन्हा दाखल

या प्रकाराची गंभीर दखल घेत जिल्हा बाल संरक्षण अधिकारी रोहिणी वाघमारे यांनी मिरज शहर पोलीस ठाणे येथे या चौघांविरुद्ध तक्रार दाखल केली आहे. या तक्रारीनुसार संबंधितांविरुद्ध अल्पवयीन न्याय (बालकांची काळजी व संरक्षण) या अधिनियमांतर्गत गुन्हा नोंदविण्यात आला आहे.

दरम्यान, महिलेकडून विक्री करण्यात आलेली दोन्ही बालके मिरज शहर पोलीस यांनी ताब्यात घेतली असून त्यांना सुरक्षिततेच्या दृष्टीने पाठक अनाथ आश्रम येथे ठेवण्यात आले आहे. सध्या या बालकांच्या प्रकृती आणि सुरक्षिततेची काळजी घेतली जात असून त्यांची आवश्यक वैद्यकीय तपासणीही करण्यात येत आहे.

पुढील तपास सुरू

या घटनेमुळे मिरज शहर परिसरात एकच खळबळ उडाली आहे. बेकायदेशीर पणे मुले दत्तक घेतल्यामुळे या प्रकरणांविरोधात कठोर कारवाईची मागणी होत आहे. संपूर्ण प्रकरणाचा सखोल तपास सध्या मिरज शहर पोलीस करीत आहेत. या घटनेनंतर तेथील नागरिकांनी देखील या प्रकाराबाबत संतप्त प्रतिक्रिया दिल्या आहेत.