Pune : पुणे जिल्ह्याला चार मंत्रिपदे; ४६ वर्षांनंतर माधुरी मिसाळ यांच्या रुपाने महिला मंत्री

Pune  : विधानसभा निवडणुकीनंतर देवेंद्र फडणवीस सरकारच्या पहिल्या मंत्रिमंडळ विस्तारात पुणे जिल्ह्याला चार मंत्रिपदे देण्यात आली आहेत. पुण्याला ४६ वर्षानंतर माधुरी मिसाळ यांच्या रूपाने महिला मंत्री मिळाली आहे. ज्येष्ठ नेते शरद पवारांचा सत्तेतील प्रभाव ओसरू लागल्यानंतर पहिल्यांदाच पुणे शहरातील लोकप्रतिनिधींचा राज्याच्या राजकारणातील दबदबा वाढू लागल्याचे प्रतिबिंब यंदाच्या मंत्रिमंडळात उमटले आहे.

विधानसभा निवडणुकीत पुणे जिल्ह्यात २१ पैकी १८ विधानसभा मतदारसंघात महायुतीने महाविकास आघाडीला धूळ चारली. शहरातही आठपैकी सात विधानसभा मतदारसंघांत महायुतीने निर्विवाद विजय मिळविला. निकालानंतर मुख्यमंत्री देवेंद्र फडणवीस यांच्या बरोबरीने उपमुख्यमंत्री अजित पवार यांनीही शपथ घेतली. त्यानंतर ‘फडणवीस ३.०’ सरकारच्या पहिल्या मंत्रिमंडळ विस्तारात पुणे शहरातून कोथरूडचे आमदार चंद्रकांत पाटील यांनी कॅबिनेट, पर्वतीच्या आमदार माधुरी मिसाळ यांनी राज्यमंत्रिपदाची शपथ घेतली, तर जिल्ह्यातून इंदापूरचे आमदार दत्तात्रय भरणे यांना मंत्रिमंडळात स्थान देण्यात आले.

केंद्रातही मंत्रिपद
पुण्याचे खासदार मुरलीधर मोहोळ केंद्रीय विमान वाहतूक व सहकार राज्यमंत्री आहेत, तर आमदार चंद्रकांत पाटील हे कॅबिनेट आणि आमदार माधुरी मिसाळ या राज्यमंत्री आहेत. यापूर्वी, १९९५ मध्ये युती सरकारच्या कार्यकाळात शिवसेनेचे शशिकांत सुतार आणि भाजपचे दिलीप कांबळे यांच्या रूपाने शहराकडे दोन मंत्रिपदे होती. २००४ मध्ये कँटोन्मेंटचे आमदार बाळासाहेब शिवरकर यांनी सार्वजनिक बांधकाम राज्यमंत्रिपद व बोपोडीचे आमदार चंद्रकांत छाजेड यांनी पर्यटन राज्यमंत्रिपद भूषवले, तर २००९ मध्ये काँग्रेसचे आमदार रमेश बागवे यांनी गृहराज्यमंत्रिपद भूषविले.

Cyber Crime : इंस्टाग्रामवरील जाहिरातीवर क्लिक करणं पडलं महागात, ७१ लाखांची फसवणूक… रशियन आरोपीला अटक

सन २०१४ मध्ये कसब्याचे आमदार गिरीश बापट यांनी अन्न व नागरी पुरवठा मंत्री म्हणून मंत्रिमंडळात काम केले, तर दिलीप कांबळे हे सामाजिक न्याय राज्यमंत्री होते. सन २०१९ नंतर उद्धव ठाकरे यांच्या महाविकास आघाडी सरकारमध्ये पुण्याला मंत्रिपद मिळाले नव्हते. त्याची भरपाई 'फडणवीस ३.०' सरकारमध्ये झाली आहे. औद्योगिक नगरी असलेल्या पिंपरी-चिंचवडचे प्रतिनिधित्व करणाऱ्या तिघांपैकी एकालाही मंत्रिमंडळात स्थान मिळालेले नाही.

सन १९९९ ते २००४ या पंचवार्षिकमध्ये खेडचे आमदार रामकृष्ण मोरे यांनी काही काळ शालेय शिक्षणमंत्री पद भूषविले होते. त्यांच्यानंतर पुण्याची 'सिस्टर सिटी' असलेल्या पिंपरी-चिंचवडच्या एकाही आमदाराची मंत्रिपदावर वर्णी लागलेली नाही. पुणे जिल्ह्याला प्रथमच मोठ्या प्रमाणावर प्रतिनिधित्व मिळाले असून, पुणे जिल्हा हा केंद्रासह राज्याच्या राजकारणात 'हेविवेट' जिल्हा ठरला आहे. महायुतीने मंत्रिमंडळात पुणे शहर व जिल्ह्याला झुकते माप देऊन आगामी महापालिका निवडणुकीची तयारी सुरु केल्याची चर्चा आहे.

जिल्ह्याला प्रथमच पाच मंत्री
केंद्रीय मंत्री मुरलीधर मोहोळ, उपमुख्यमंत्री अजित पवार, कॅबिनेटमंत्री चंद्रकांत पाटील व दत्तात्रेय भरणे आणि राज्यमंत्री माधुरी मिसाळ यांच्या रूपाने पुणे जिल्ह्याला प्रथमच पाच मंत्रिपदे मिळाली असून, पुणे जिल्हा हा केंद्रासह राज्याच्या राजकारणात ‘हेवीवेट’ जिल्हा ठरला आहे. महायुतीने मंत्रिमंडळात पुणे शहर व जिल्ह्याला झुकते माप देऊन आगामी महापालिका निवडणुकीची तयारी सुरू केल्याची चर्चा आहे.