हरियाना – हडप्पन लोकांच्या सवयी समजणार

राखीगड (हरियाना) - हडप्पाकालिन राखीगड भागात उत्खनात सापडलेल्या सांगाड्यातून डीएनए मिळविण्यात यश आले असल्याने या काळातील लोकांच्या खाण्यापिण्याच्या सवयी समजण्याची आशा संशोधकांना निर्माण झाली आहे. हे डीएनए शास्त्रीय अभ्यासासाठी प्रयोगशाळेत पाठविण्यात आले आहेत. हरियानातील राखीगड हा हडप्पाकालिन ठिकाणच्या स्मशानभूमीत भारतीय पुरातत्त्व विभागातर्फे सुरु असलेल्या उत्खननात दोन महिन्यांपूर्वी दोन महिलांचे सांगाडे आढळले होते. हे सांगाडे असलेल्या खड्ड्यांमध्ये काही भांडी आणि इतर काही वस्तूही आढळल्या. या वस्तूंचा आणि सांगाड्यांचा कालावधी पाच हजार वर्षांपूर्वीचा असल्याचा अंदाज आहे. ही स्मशानभूमी उत्खनन सुरु असलेल्या सातव्या क्रमांकाच्या ढिगाऱ्याखाली आहे. हा ढिगारा राखी खास आणि राखी शाहपूर या दोन गावांच्या बाहेर पसरलेला आहे. ही दोन्ही गावे हरियानातील हिसार जिल्ह्यातील राखीगड उत्खनन स्थळाचा हिस्सा आहेत.